സാമന്തയും നാഗ ചൈതന്യയും ഒന്നിച്ചഭിനയിക്കേണ്ട ചിത്രം; ഇനിയെങ്ങനെ ചെയ്യുമെന്നതിനു പോംവഴി തേടി സംവിധായിക..!

തെലുങ്കിലെ യുവ താരമായ നാഗ ചൈതന്യയും തെന്നിന്ത്യയിലെ സൂപ്പർ നായികയായ സാമന്തയും ഈ അടുത്തിടെയാണ് വിവാഹ മോചിതരാവാൻ തീരുമാനിച്ചത്. എന്നാൽ ഈ വിവാഹ മോചനം അവരുടെ ഇനി വരാനിരിക്കുന്ന സിനിമ പ്രൊജെക്ടുകളെ കൂടി ബാധിച്ചിട്ടുണ്ട് എന്ന വാർത്തകളാണ് ഇപ്പോൾ വരുന്നത്. ഇപ്പോൾ പുറത്തു വരുന്ന ചില റിപ്പോർട്ടുകൾ പ്രകാരം, വരാനിരിക്കുന്ന ഒരു പ്രോജക്റ്റിൽ സാമന്തയും ചൈതന്യയും ഒന്നിച്ചഭിനയിക്കേണ്ടത് ആയിരുന്നു. സംവിധായിക നന്ദിനി റെഡ്ഡി ഒരുക്കാൻ പോകുന്ന ചിത്രമായിരുന്നു അത്. സാമന്തയുടെ, ജബർദസ്ത് (2013), ഓ! ബേബി (2019) എന്നീ രണ്ടു പ്രൊജെക്ടുകൾ ഒരുക്കിയിട്ടുള്ള നന്ദിനി സമാന്തയുമായി ഒന്നിക്കുന്ന മൂന്നാമത്തെ ചിത്രമാണ് ഇപ്പോൾ പ്രതിസന്ധിയിൽ ആയിരിക്കുന്നത്. നാഗ ചൈതന്യയെ നായകനാക്കാനായി ചർച്ചകൾ നടത്തി എല്ലാം സെറ്റായി വന്നപ്പോഴാണ് സാമന്ത- നാഗ ചൈതന്യ വിവാഹ മോചനം വരുന്നത്.

അതോടെ സിനിമാ പ്ലാനുകൾ എല്ലാം മാറി മറിഞ്ഞു. കഴിഞ്ഞ വർഷം ഒക്ടോബറിലാണ് സാമന്തയും ചൈതന്യയും വേർപിരിയുന്നതായി പ്രഖ്യാപനം ഉണ്ടായതു. തങ്ങളുടെ വേർപിരിയൽ അറിയിക്കാൻ സാമന്തയും നാഗ ചൈതന്യയും സോഷ്യൽ മീഡിയയിൽ ഒരുപോലെയുള്ള പ്രസ്താവനകൾ ഇടുകയും ശേഷം സാമന്ത ഇൻസ്റ്റഗ്രാമിൽ ചൈതന്യയെ അൺഫോളോ ചെയ്യുകയും ചെയ്തു. ഏതായാലും ഇതോടെ സംവിധായിക നന്ദിനി തന്റെ ചിത്രത്തിൽ സാമന്തയ്ക്കു പകരക്കാരെ തേടി തുടങ്ങി എന്ന വാർത്തയാണ് വരുന്നത്. വേർപിരിഞ്ഞതിന് ശേഷം സാമന്തയും ചൈതന്യയും ഒരു സിനിമയിൽ ഒരുമിച്ച് അഭിനയിക്കാൻ തയ്യാറായിട്ടില്ല എന്നതാണ് ഇതിനു പ്രധാന കാരണം. നാഗ ചൈതന്യയ്ക്ക് ഒപ്പം നിൽക്കാൻ ആണ് സംവിധായിക നന്ദിനിയുടെ തീരുമാനം എന്നാണ് റിപ്പോർട്ടുകൾ വരുന്നത്. അത്കൊണ്ട് തന്നെ ഇനി സാമന്തക്ക് പകരം ആ ചിത്രത്തിൽ ആര് വരും എന്നറിയാനുള്ള കാത്തിരിപ്പിലാണ് ആരാധകർ.