സാമന്ത- ദേവ് മോഹൻ ചിത്രം ശാകുന്തളം റിലീസ് തീയതി എത്തി

ഭാരതത്തിന്റെ ഇതിഹാസമായ മഹാഭാരതത്തിലെ, ശകുന്തള-ദുഷ്യന്തൻ പ്രണയകഥയായ ‘അഭിജ്ഞാന ശാകുന്തളം’ എന്ന കൃതിയെ ആസ്പദമാക്കി ഒരുങ്ങിയ ചിത്രമാണ് ശാകുന്തളം. ഇപ്പോഴിതാ ഈ ചിത്രത്തിന്റെ റിലീസ് തീയതി പുറത്ത് വിട്ടിരിക്കുകയാണ് അണിയറപ്രവർത്തകർ. 2023 ഫെബ്രുവരി 17 ന് ആണ് ഈ ചിത്രം തീയേറ്ററുകളിൽ എത്തുന്നത്. 3D-യിലും റിലീസ് ചെയ്യാൻ പോകുന്ന ഈ ചിത്രം കാഴ്ചക്കാർക്ക് പുത്തൻ അനുഭവമാണ് സമ്മാനിക്കുക. തെന്നിന്ത്യൻ സൂപ്പർ നായികാ താരമായ സാമന്ത ശകുന്തളയായി എത്തുമ്പോൾ, സൂഫിയും സുജാതയും എന്ന മലയാള ചിത്രത്തിലൂടെ ശ്രദ്ധേയനായ ദേവ് മോഹനാണ് ദുഷ്യന്തനായി അഭിനയിച്ചത്.

ഗുണശേഖറാണ് ഈ ചിത്രം തിരക്കഥയെഴുതി സംവിധാനം ചെയ്തിരിക്കുന്നത്. സ്ത്രീപക്ഷ സിനിമകളിൽ വച്ച് ഏറ്റവും വലിയ ബജറ്റിലാണ് ഈ ചിത്രം ഒരുക്കിയിരിക്കുന്നത് എന്നതും എടുത്തു പറയേണ്ട വസ്തുതയാണ്. പ്രശസ്ത നടി അദിതി ബാലൻ അനസൂയായും മോഹൻ ബാബു ദുർവാസാവ് മഹർഷിയായും എത്തുന്ന ഈ ചിത്രത്തിൽ, ഇവരെ കൂടാതെ സച്ചിൻ ഖേദേക്കർ കബീർ ബേദി, മധുബാല, ഗൗതമി, അനന്യ നാഗല്ല, ജിഷു സെൻഗുപ്ത എന്നിവരും വേഷമിടുന്നു. ഐക്കൺ സ്റ്റാർ അല്ലു അർജുന്റെ മകൾ അല്ലു അർഹയും ഈ ചിത്രത്തിൽ ഒരു നിർണ്ണായക വേഷം ചെയ്യുന്നുണ്ട്. മണി ശർമ സംഗീത സംവിധാനം നിർവ്വഹിച്ച ഈ ചിത്രത്തിന് ശേഖർ വി ജോസഫ് ഛായാഗ്രഹണവും പ്രവീൺ പുഡി എഡിറ്റിങ്ങും നിർവഹിച്ചിരിക്കുന്നു. ദിൽ രാജു അവതരിപ്പിക്കുന്ന ഈ ചിത്രം ഗുണാ ടീംവർക്സിന്റെ ബാനറിൽ നീലിമ ഗുണയാണ് നിർമ്മിച്ചിരിക്കുന്നത്. തെലുങ്കിന് പുറമേ മലയാളം, തമിഴ്, കന്നഡ, ഹിന്ദി ഭാഷകളിൽ കൂടി ഈ ചിത്രം റിലീസ് ചെയ്യും.