കൈയബദ്ധം ഒന്നും കാണിക്കരുത്, നാറ്റിക്കരുതെന്നു രമേശ് പിഷാരടിയോട് സലിം കുമാർ..!

മലയാളത്തിലെ പ്രശസ്ത ഹാസ്യ നടനും സംവിധായകനുമായ സലിം കുമാർ പങ്കു വെച്ച ഒരു ഫേസ്ബുക് പോസ്റ്റും അതിനൊപ്പം കുറിച്ച വാക്കുകളുമാണ് ഇപ്പോൾ സോഷ്യൽ മീഡിയയുടെ ശ്രദ്ധ നേടുന്നത്. സലിം കുമാർ പങ്കു വെച്ചിരിക്കുന്നത് മലയാളത്തിലെ മറ്റൊരു പ്രശസ്ത ഹാസ്യ നടനും സംവിധായകനും ടെലിവിഷൻ അവതാരകനുമായ രമേശ് പിഷാരടിയുടെ ഫേസ്ബുക് പോസ്റ്റാണ്. തനിക്കു അയച്ചു കിട്ടിയ ഒരു ട്രോള് പങ്കു വെച്ചാണ് രമേശ് പിഷാരടി ഫേസ്ബുക് പോസ്റ്റ് ഇട്ടിരിക്കുന്നത്. മിമിക്രിയിലൂടെയും ചാനൽ പരിപാടികളിലൂടെയും രമേശ് പിഷാരടി തന്റെ കലാ ജീവിതം ആരംഭിച്ച കാലത്തു രമേശ് പിഷാരടിക്കു ഏറെ സഹായങ്ങൾ ചെയ്ത വ്യക്തിയാണ് സലിം കുമാർ. അതിനെ അടിസ്ഥാനപ്പെടുത്തിയാണ് ട്രോള് ഉണ്ടാക്കിയിരിക്കുന്നത്. രമേശ് പിഷാരടിക്കു മലയാള സിനിമാ-ടെലിവിഷൻ രംഗത്തെ ഓൾ റൗണ്ടർ എന്ന പേരിൽ അവാർഡ് ലഭിച്ചത്, സലിം കുമാർ എന്ന സകലകലാ വല്ലഭന്റെ ശിക്ഷണത്തിന്റെ ഗുണമാണ് എന്ന് സൂചിപ്പിക്കുന്ന ആ ട്രോൾ രമേശ് പിഷാരടി പങ്കു വെച്ചിരിക്കുന്നത് ഈ വാക്കുകളോടെ, അയച്ചു കിട്ടിയ ഈ ട്രോൾ പോസ്റ്റ് ചെയ്‌ത് പരസ്യമായി ഗുരുപൂജ ചെയ്തിരിക്കുന്നു. ആശാൻ ആശാൻ.

ആ പോസ്റ്റ് പങ്കു വെച്ച് കൊണ്ട് സലിം കുമാർ കുറിച്ചിരിക്കുന്നതാവട്ടെ, അവന് പരസ്യമായി ഗുരുപൂജ ചെയ്യണമെന്ന്. അതും ഫേസ്ബൂക്കിന്റെ നടയിൽ വെച്ച്. ഞാൻ ഫസ്റ്റിലെ പറഞ്ഞതാണ്. കൈയബദ്ധം ഒന്നും കാണിക്കരുത്. നാറ്റിക്കരുതെന്ന്. എന്നാണ്. മായാവി എന്ന സൂപ്പർ ഹിറ്റ് ചിത്രത്തിൽ സലിം കുമാർ അവതരിപ്പിച്ച കണ്ണൻ സ്രാങ്ക് എന്ന കഥാപാത്രം പറയുന്ന ഡയലോഗുകൾ ആണ് രമേശ് പിഷാരടിയും പിന്നീട് സലിം കുമാറും വളരെ രസകരമായി തങ്ങളിട്ട ഫേസ്ബുക് പോസ്റ്റുകൾക്കൊപ്പം കുറിച്ചിരിക്കുന്നത്. ഏതായാലും ആശാന്റേയും ശിഷ്യന്റെയും പോസ്റ്റുകൾ ഇപ്പോൾ ഏറെ ശ്രദ്ധ നേടുകയാണ്.