ജയറാമിനെ നായകനാക്കി സലിം കുമാർ ഒരുക്കുന്ന ചിത്രം ഒരു കമ്പ്ലീറ്റ് എന്റെർറ്റൈനെർ; ചിത്രീകരണം ഉടൻ തുടങ്ങുന്നു..!

ദേശീയ അവാർഡ് ജേതാവായ നടൻ സലിം കുമാർ ഒരു സംവിധായകൻ എന്ന നിലയിലും പ്രശസ്തൻ ആണ് . കംപാർട്മെന്റ്, കറുത്ത ജൂതൻ എന്നീ ചിത്രങ്ങൾ ആണ് സലിം കുമാർ ഇത് വരെ സംവിധാനം ചെയ്ത രണ്ടു ചിത്രങ്ങൾ. വലിയ താര നിരയുടെ പിൻബലം ഇല്ലാതെ കലാമൂല്യം ഉള്ള ചിത്രങ്ങൾ ആണ് സലിം കുമാർ ഇതുവരെ ഒരുക്കിയ രണ്ടു ചിത്രങ്ങളും. ഹാസ്യ നടൻ എന്ന നിലയിലാണ് സലിം കുമാറിന്റെ പ്രശസ്തി എങ്കിലും അദ്ദേഹം സംവിധാനം ചെയ്ത രണ്ടു ചിത്രങ്ങളും വിനോദ ചിത്രങ്ങൾ ആയിരുന്നില്ല എന്ന് മാത്രമല്ല വൈകാരികമായ അംശത്തിനു പ്രാമുഖ്യം കൊടുത്താണ് സലിം കുമാർ രണ്ടു ചിത്രങ്ങളും ഒരുക്കിയത്. നിരൂപക പ്രശംസ ഏറ്റു വാങ്ങിയ രണ്ടു ചിത്രങ്ങൾക്ക് ശേഷം സലിം കുമാർ ഇപ്പോൾ ആദ്യമായി ഒരു കമ്പ്ലീറ്റ് എന്റെർറ്റൈനെർ ഒരുക്കാൻ പോവുകയാണ്.

പ്രശസ്ത നടൻ ജയറാം ആണ് സലിം കുമാർ സംവിധാനം ചെയ്യാൻ പോകുന്ന ഈ വിനോദ ചിത്രത്തിൽ നായകൻ ആയി എത്തുന്നത്. പ്രശസ്ത നടി മംമ്ത മോഹന്‍ദാസാണ് ഈ ചിത്രത്തിലെ നായിക. സലിംകുമാര്‍ തന്നെ തിരക്കഥയൊരുക്കുന്ന ഈ ചിത്രത്തിന്റെ ഷൂട്ടിംഗ് വരുന്ന ഒക്ടോബര്‍ 10ന് ഈരാറ്റുപേട്ടയില്‍ ആരംഭിക്കും എന്നാണ് അറിവ് . പൂര്‍ണമായും നര്‍മ്മത്തിന്റെ പശ്ചാത്തലത്തില്‍ കഥ പറയുന്ന ചിത്രമായിരിക്കും ഇതെന്ന് സലിംകുമാര്‍ മാധ്യമങ്ങളോട് പറഞ്ഞു. വിനായകന്‍, ശ്രീനിവാസന്‍, നെടുമുടി വേണു, മാമുക്കോയ, സുരാജ് വെഞ്ഞാറമ്മൂട് എന്നിവരും കുടുംബ പശ്ചാത്തലത്തിൽ കഥ പറയുന്ന ഈ ചിത്രത്തിൽ അഭിനയിക്കുന്നുണ്ട്. സലിം കുമാറും ഈ ചിത്രത്തിൽ അഭിനയിക്കുന്നുണ്ട്. ഇതിനു മുൻപേ ‘കഥ തുടരുന്നു’, ‘ഞാനും എന്റെ ഫാമിലിയും’ എന്നീ ചിത്രങ്ങളില്‍ ജയറാമും മംമ്ത മോഹന്‍ദാസും ഒരുമിച്ചു അഭിനയിച്ചിട്ടുണ്ട്.