പുഷ്പരാജിനൊപ്പം സായ് പല്ലവിയും; പുഷ്പ 2 ആരംഭിക്കുന്നു

ഇന്ന് ഇന്ത്യൻ സിനിമാ പ്രേമികൾ ഒന്നടങ്കം കാത്തിരിക്കുന്ന ബ്രഹ്മാണ്ഡ തെലുങ്ക് ചിത്രങ്ങളിലൊന്നാണ്, തെലുങ്കിലെ ഐക്കൺ സ്റ്റാർ അല്ലു അർജുൻ നായകനായ പുഷ്പ 2. അത്ര വലിയ തരംഗമാണ് ഇതിന്റെ ആദ്യ ഭാഗം ഇന്ത്യൻ സിനിമയിൽ സൃഷ്ഠിച്ചത്. ഈ കഴിഞ്ഞ ഡിസംബറിൽ റിലീസ് ചെയ്ത് ബ്ലോക്ക്ബസ്റ്റർ വിജയമാണ് പുഷ്പ നേടിയത്. പാൻ ഇന്ത്യൻ തലത്തിൽ വിജയം നേടിയ ഇതിന്റെ ഹിന്ദി ഡബ്ബ് വേർഷൻ മാത്രം നൂറു കോടിക്ക് മുകളിൽ കളക്ഷൻ നേടി ചരിത്രം കുറിച്ചിരുന്നു. അല്ലു അർജുന്റെ കരിയറിലെ ഏറ്റവും വലിയ ഹിറ്റായ ഈ ചിത്രം സംവിധാനം ചെയ്തത് സുകുമാർ ആണ്. മുന്നൂറ് കോടിക്ക് മുകളിൽ ടോട്ടൽ ഗ്രോസ് നേടിയ ഈ ചിത്രത്തിൽ പുഷ്പരാജ് എന്ന ചന്ദനത്തടി കള്ളക്കടത്തുകാരനായാണ് അല്ലു അർജുൻ അഭിനയിച്ചത്. ഇതിന്റെ രണ്ടാം ഭാഗത്തിന്റെ പൂജ കുറച്ചു നാൾ മുൻപാണ് നടന്നത്. ഇപ്പോഴിതാ ഒക്ടോബർ ഒന്ന് മുതൽ പുഷ്പ 2 ന്റെ ഷൂട്ടിംഗ് ആരംഭിക്കുമെന്നാണ് സൂചന. അതിനൊപ്പം തന്നെ തെന്നിന്ത്യൻ സൂപ്പർ നായികാ താരം സായ് പല്ലവിയും ഇതിന്റെ ഭാഗമാകുമെന്നുള്ള വാർത്തകളാണ് വരുന്നത്.

ഒരു ഗ്രാമീണ പെണ്കുട്ടിയായാവും സായ് പല്ലവി അഭിനയിക്കുകയെന്നും റിപ്പോർട്ടുകൾ പറയുന്നു. രശ്‌മിക മന്ദാന നായികാ വേഷം ചെയ്യുന്ന ഈ ചിത്രത്തിൽ വില്ലനായി എത്തുന്നത് മലയാളി താരം ഫഹദ് ഫാസിലാണ്. ഭൻവർ സിങ് എന്ന പോലീസ് ഓഫീസറായാണ് ഫഹദ് ഇതിലഭിനയിക്കുക. ഫഹദിനെ കൂടാതെ വിജയ് സേതുപതിയും ഇതിലെത്തുന്നുണ്ടെന്ന വാർത്തകൾ വരുന്നുണ്ട്. ഒരു ഫോറെസ്റ്റ് ഓഫീസറായാണ് വിജയ് സേതുപതി ഇതിൽ വേഷമിടുകയെന്നാണ് സൂചന. നടി സാമന്തയുടെ ഐറ്റം ഡാൻസ് ആദ്യ ഭാഗത്തിന്റെ ഹൈലൈറ്റുകളിൽ ഒന്നായിരുന്നുവെങ്കിൽ, ഈ രണ്ടാം ഭാഗത്തിൽ ഐറ്റം ഡാൻസ് ചെയ്യാനെത്തുന്നത് ബോളിവുഡ് സുന്ദരി മലൈക അറോറയാണെന്നാണ് റിപ്പോർട്ടുകൾ നമ്മളോട് പറയുന്നത്. മൈത്രി മൂവി മേക്കേഴ്സ് നിര്‍മ്മിക്കുന്ന ഈ ചിത്രത്തിന് സംഗീതം പകരുന്നത് ദേവി ശ്രീ പ്രസാദ് ആണ്