ആവേശമുയർത്താൻ സച്ചിൻ ഗൾഫിലും എത്തുന്നു; സൂപ്പർ ഹിറ്റായി ധ്യാൻ ചിത്രം..!

ധ്യാൻ ശ്രീനിവാസൻ- അജു വർഗീസ് എന്നിവർ പ്രധാന വേഷങ്ങളിൽ എത്തിയ സച്ചിൻ എന്ന ചിത്രം ഇപ്പോൾ കേരളത്തിൽ സൂപ്പർ ഹിറ്റായി മുന്നേറുകയാണ്. മണി രത്‌നം എന്ന ഫഹദ് ഫാസിൽ ചിത്രമൊരുക്കി അരങ്ങേറിയ സന്തോഷ് നായർ സംവിധാനം ചെയ്ത ഈ ചിത്രത്തിന് തിരക്കഥ ഒരുക്കിയിരിക്കുന്നത് പ്രശസ്ത സംവിധായകനും കൂടിയായ എസ് എൽ പുരം ജയസൂര്യ ആണ്. ക്രിക്കറ്റിന്റെ ആവേശവും പ്രണയവും തമാശയും നിറഞ്ഞ ഈ ചിത്രം കുടുംബ പ്രേക്ഷകരും യുവാക്കളും ഇരു കയ്യും നീട്ടിയാണ് സ്വീകരിക്കുന്നത്. നാളെ മുതൽ ഈ ചിത്രം ഗൾഫിലും പ്രദർശനം ആരംഭിക്കുകയാണ്. കേരളത്തിൽ നേടിയ വിജയം ഈ ചിത്രം വിദേശത്തും ആവർത്തിക്കും എന്നാണ് അണിയറ പ്രവർത്തകരുടെ പ്രതീക്ഷ.

ജൂഡ് ആഗ്നെൽ സുധിർ, ജൂബി നൈനാൻ എന്നിവർ ചേർന്ന് ജെ ജെ പ്രൊഡക്ഷൻസിന്റെ ബാനറിൽ ആണ് ഈ ചിത്രം നിർമ്മിച്ചിരിക്കുന്നത്. ഹാരിഷ് കണാരൻ, അപ്പാനി ശരത്, രമേശ് പിഷാരടി, രഞ്ജി പണിക്കർ, മണിയൻ പിള്ള രാജു, കൊച്ചു പ്രേമൻ, ബാലാജി ശർമ്മ എന്നിവരും പ്രധാന വേഷങ്ങൾ ചെയ്ത ഈ ചിത്രത്തിലെ നായികാ വേഷം ചെയ്തിരിക്കുന്നത് അങ്കമാലി ഡയറീസ്, വെളിപാടിന്റെ പുസ്തകം എന്നീ ചിത്രങ്ങളിലൂടെ ശ്രദ്ധേയയായ അന്ന രാജൻ ആണ്. ഷാൻ റഹ്‌മാൻ ഈണമിട്ട ഈ ചിത്രത്തിലെ ഗാനങ്ങൾ സൂപ്പർ ഹിറ്റായിരുന്നു. നീൽ ഡികുന്ന ഒരുക്കിയ ദൃശ്യങ്ങളും രഞ്ജൻ അബ്രഹാം നിർവഹിച്ച എഡിറ്റിംഗും ഈ ചിത്രത്തിന്റെ മികവ് വർധിപ്പിച്ചു. വളരെയധികം ചിരിപ്പിക്കുന്ന മുഹൂർത്തങ്ങൾ നിറഞ്ഞ രസകരമായ ഒരു ക്ലീൻ എന്റർറ്റെയിനെർ ആയാണ് സച്ചിൻ ഒരുക്കിയിരിക്കുന്നത്.