നിവിൻ പോളി കായംകുളം കൊച്ചുണ്ണി ആവുമ്പോൾ താൻ ഇത്തിക്കര പക്കി ആവില്ല എന്നു പറഞ്ഞ നടൻ ആര്; മനസ്സ് തുറന്ന് സംവിധായകൻ..!

2018 ഇൽ റിലീസ് ചെയ്ത് ആ വർഷം മലയാളത്തിലെ ഏറ്റവും വലിയ ഹിറ്റായി മാറിയ ചിത്രമാണ് നിവിൻ പോളി- റോഷൻ ആൻഡ്രൂസ് കൂട്ടുകെട്ടിൽ ഒരുങ്ങിയ കായംകുളം കൊച്ചുണ്ണി എന്ന ബിഗ് ബഡ്ജറ്റ് ചിത്രം. ഗോകുലം ഗോപാലൻ നിർമ്മിച്ച ഈ ചിത്രം രചിച്ചത് ബോബി- സഞ്ജയ് ടീം ആണ്. നിവിൻ പോളി കായംകുളം കൊച്ചുണ്ണി ആയി അഭിനയിച്ച ഈ ചിത്രത്തിൽ ഇത്തിക്കര പക്കി എന്ന കഥാപാത്രം ആയി 20 മിനിറ്റോളം ദൈർഘ്യമുള്ള ഒരു കഥാപാത്രം അവതരിപ്പിച്ചത് മലയാളത്തിന്റെ സൂപ്പർ മെഗാ താരമായ മോഹൻലാൽ ആണ്. ഇത്തിക്കര പക്കി ആയി വിസ്മയിപ്പിക്കുന്ന പ്രകടനം കാഴ്ച്ച വെച്ച മോഹൻലാലിന്റെ സാന്നിധ്യം ഈ ചിത്രത്തിന്റെ വലിയ വിജയത്തിൽ വളരെ നിർണ്ണായകമായ പങ്കാണ് വഹിച്ചത്.

എന്നാൽ ഇതിന്റെ തിരക്കഥ പൂർത്തിയായ സമയത്തും അതുപോലെ ഷൂട്ടിംഗ് ആരംഭിച്ച സമയത്തും മലയാളത്തിലെ തന്നെ ചില പ്രമുഖ താരങ്ങളെ ഈ വേഷം ചെയ്യാൻ സമീപിച്ചിരുന്നു എങ്കിലും, നിവിൻ പോളി നായക വേഷം ചെയ്യുന്ന ഈ ചിത്രത്തിൽ ഒരു അതിഥി വേഷം ചെയ്യാൻ തയ്യാറല്ല എന്ന രീതിയിൽ പ്രതികരിച്ചവർ ആയിരുന്നു പലരും എന്ന് സംവിധായകൻ റോഷൻ ആൻഡ്രൂസ് പറയുന്നു. അതിനു ശേഷം ആണ് മോഹൻലാൽ എന്ന മഹനടനിലേക്ക് ഈ ചിത്രം എത്തിയത് എന്നും റോഷൻ പറഞ്ഞു. ചിത്രത്തിന്റെ കഥയും കഥാപാത്രവും അറിഞ്ഞപ്പോൾ യാതൊരു വിധ ഈഗോയും കൂടാതെ വളരെ സന്തോഷത്തോടെ അദ്ദേഹം ഈ ചിത്രം ചെയ്യാൻ സമ്മതിച്ചു എന്നും റോഷൻ വെളിപ്പെടുത്തുന്നു. ഇത്തരം ഒരു ചിത്രത്തിന്റെ ഭാഗമാവേണ്ട കാര്യം അദ്ദേഹത്തിന് ഇല്ലെങ്കിലും, അദ്ദേഹം അതിനു തയ്യാറായത് ആ വലിയ മനസ്സാണ് നമ്മുക്ക് കാണിച്ചു തരുന്നതെന്നും റോഷൻ ആൻഡ്രൂസ് കൈരളി ടിവിയിലെ ജെ ബി ജംക്ഷൻ എന്ന പരിപാടിയിൽ പറയുന്നു. ലാലേട്ടനൊപ്പം അഭിനയിച്ച ഓരോ നിമിഷവും ഈ ഭാഗ്യം ഒരുക്കി തന്നതിന് ദൈവത്തിനോട് നന്ദി പറഞ്ഞു കൊണ്ടാണ് താൻ നിന്നതെന്നു നിവിൻ പോളിയും വ്യക്തമാക്കി.