മോഹൻലാൽ- മമ്മൂട്ടി ചിത്രം ശ്രീലങ്കയിൽ?; ഒരുക്കാൻ മഹേഷ് നാരായണൻ

മലയാളത്തിന്റെ മഹാനടന്മാരും മെഗാതാരങ്ങളുമായ മോഹൻലാൽ, മമ്മൂട്ടി എന്നിവർ ഒരു വലിയ ഇടവേളക്ക് ശേഷം ഒരുമിക്കുന്നു എന്ന വാർത്തകൾ കഴിഞ്ഞ മാസമാണ് പുറത്ത് വന്നത്. റിപ്പോർട്ടുകൾ പ്രകാരം മോഹൻലാൽ- മമ്മൂട്ടി ടീം ഒന്നിക്കുന്ന രണ്ടു ചിത്രങ്ങളാണ് അണിയറയിൽ ഒരുങ്ങുന്നത്. അതിൽ ഒരെണ്ണത്തിൽ മമ്മൂട്ടി നായകനായി എത്തുകയും മോഹൻലാൽ അതിഥി വേഷം ചെയ്യുകയും, രണ്ടാമത്തേതിൽ മോഹൻലാൽ നായകനായി എത്തുകയും മമ്മൂട്ടി അതിഥി വേഷത്തിലെത്തുകയും ചെയ്യുമെന്നാണ് വാർത്തകൾ വന്നത്.

ആശീർവാദ് സിനിമാസ്, മമ്മൂട്ടി കമ്പനി എന്നിവർ ഈ പ്രൊജെക്ടുകൾക്ക് വേണ്ടി ഒന്നിച്ചു പ്രവർത്തിക്കുമെന്നും വാർത്തകൾ വന്നു. ഇപ്പോഴിതാ, മോഹൻലാൽ- മമ്മൂട്ടി കൂട്ടുകെട്ടിൽ ഒരുങ്ങാൻ പോകുന്ന ഇതിലെ ആദ്യ ചിത്രം സംവിധാനം ചെയ്യുന്നത് മഹേഷ് നാരായണൻ ആണെന്നുള്ള വിവരമാണ് വരുന്നത്. ഇ ടി വി ഭാരത് റിപ്പോർട്ട് ചെയ്യുന്നത് പ്രകാരം ഈ ചിത്രം ഒരുക്കുന്നത് ശ്രീലങ്ക, കേരളം, ഡൽഹി, ലണ്ടൻ എന്നിവിടങ്ങളിൽ ആയാവും. ശ്രീലങ്കയിൽ 30 ദിവസം ഷൂട്ട് ചെയ്യുന്ന ഈ ചിത്രത്തിന് ഷൂട്ടിംഗ് അനുമതികൾ വാങ്ങാനായി, മഹേഷ് നാരായണൻ, നിർമ്മാതാവ് ആന്റോ ജോസഫ്, സി വി സാരഥി എന്നിവർ ശ്രീലങ്കൻ പ്രധാനമന്ത്രി ദിനേശ് ഗുണവർധനയെ സെപ്റ്റംബർ 15 നു കാണുകയും സംസാരിക്കുകയും ചെയ്തിരുന്നു.

മഹേഷ് നാരായണൻ ഒരുക്കാൻ പോകുന്ന ഈ ബിഗ് ബഡ്ജറ്റ് ചിത്രത്തിൽ അതിഥി വേഷമാണ് മോഹൻലാൽ ചെയ്യുക എന്ന് വാർത്തയുണ്ട്. മമ്മൂട്ടി നായകനായി എത്തുന്ന ഈ ചിത്രത്തിൽ ഫഹദ് ഫാസിൽ, കുഞ്ചാക്കോ ബോബൻ, സുരേഷ് ഗോപി എന്നിവരും ഉണ്ടാകുമെന്ന് നേരത്തെ സൂചനയുണ്ടായിരുന്നു. എന്നാൽ സുരേഷ് ഗോപി പിന്മാറിയതോടെയാണ് ആ വേഷത്തിലേക്ക് മോഹൻലാൽ എത്തിയതെന്നും സ്ഥിരീകരിക്കാത്ത വാർത്തകളുണ്ട്. ഏതായാലും ചിത്രത്തിന്റെ ഔദ്യോഗിക പ്രഖ്യാപനത്തിനായി കാത്തിരിക്കുകയാണ് ആരാധകർ.