ഇന്ദ്രന്‍സിന്റെ ഹോമും മണിച്ചിത്രത്താഴും തമ്മിലുള്ള ബന്ധം; രഹസ്യം കണ്ടുപിടിച്ചു സോഷ്യൽ മീഡിയ..!

ഈ അടുത്തിടെ ഒടിടി റിലീസ് ആയി എത്തിയ മലയാള ചിത്രങ്ങളിൽ ഏറ്റവും മികച്ച പ്രേക്ഷകാഭിപ്രായം നേടിയ ചിത്രമാണ് ഇന്ദ്രൻസ് നായകനായി എത്തിയ ഹോം എന്ന ചിത്രം. ഫ്രൈഡേ ഫിലിം ഹൗസിന്റെ ബാനറിൽ വിജയ് ബാബു നിർമ്മിച്ച ഈ ചിത്രം രചിച്ചു സംവിധാനം ചെയ്തത് റോജിൻ തോമസ് ആണ്. അടുത്ത കാലത്തിറങ്ങിയ ഏറ്റവും മികച്ച ഫീല്‍ ഗുഡ് ചിത്രമെന്ന പേരും ഹോം നേടിക്കഴിഞ്ഞു. ഇന്ദ്രൻസ് നടത്തിയ ഞെട്ടിക്കുന്ന പ്രകടനം തന്നെയാണ് ഈ ചിത്രത്തിന്റെ ഹൈലൈറ്റ്. ഇന്ദ്രൻസിനൊപ്പം മഞ്ജു പിള്ളൈ, ശ്രീനാഥ് ഭാസി, നസ്ലിൻ, ജോണി ആന്റണി, വിജയ് ബാബു, മണിയൻ പിള്ള രാജു, അനൂപ് മേനോൻ, ശ്രീകാന്ത് മുരളി, കെ പി എ സി ലളിത, കൈനകരി തങ്കരാജ് എന്നിവരും ഈ ചിത്രത്തിലെ മികച്ച പ്രകടനത്തിലൂടെ കയ്യടി നേടിയെടുത്തു. ഇപ്പോഴിതാ ഈ ചിത്രവും മലയാളത്തിലെ ക്ലാസിക് ചിത്രമായ മണിച്ചിത്രത്താഴും തമ്മിലുള്ള ബന്ധം തപ്പി എടുത്തിരിക്കുകയാണ് സോഷ്യൽ മീഡിയ.

ഫാസിൽ ഒരുക്കിയ മണിച്ചിത്രത്താഴ് മലയാളത്തിലെ ഇൻഡസ്ട്രി ഹിറ്റായി മാറിയ ചിത്രമാണ്. മോഹൻലാൽ നായകനായ ഈ ചിത്രത്തിൽ അദ്ദേഹം അവതരിപ്പിച്ച കഥാപാത്രത്തിന്റെ പേരാണ് ഡോക്ടർ സണ്ണി ജോസഫ്. മണിച്ചിത്രത്താഴില്‍ തിലകന്റെ കഥാപാത്രം മോഹൻലാലിന്റെ സണ്ണി ജോസഫിനെ കുറിച്ച് പറയുമ്പോള്‍, ‘ആധുനിക മനശാസ്ത്രത്തിലെ ലോകപ്രശസ്തമായ രണ്ട് പ്രബന്ധങ്ങള്‍ ഈ നില്‍ക്കുന്ന രാവണന്റെയാ’ എന്ന ഡയലോഗാണ് പറയുന്നത്. ഇപ്പോൾ ഹോം എന്ന ചിത്രത്തിൽ സൈക്കോളജിസ്റ്റ് ആയി എത്തുന്ന വിജയ് ബാബു കഥാപാത്രത്തിന്റെ ക്ലിനിക്കിലെ മേശപ്പുറത്തു ഇരിക്കുന്ന പുസ്തകങ്ങൾക്ക് ആണ് പ്രേക്ഷകർ മണിച്ചിത്രത്താഴ് ബന്ധം കണ്ടു പിടിക്കുന്നത്. കാരണം ആ പുസ്തകങ്ങളുടെ പേര് ‘പ്രബന്ധം, ഡോ. സണ്ണി’ എന്നാണ്. മോഹൻലാലിൻറെ സണ്ണി എന്ന കഥാപാത്രം രചിച്ചു എന്ന് തിലകൻ കഥാപാത്രം പറയുന്ന ആ പ്രബന്ധങ്ങൾ ആണ് വിജയ് ബാബിബുവിന്റെ ഡോക്ടർ കഥാപാത്രത്തിന്റെ മുന്നിൽ ഉള്ളതെന്നാണ് സോഷ്യൽ മീഡിയയിലെ സിനിമ പ്രേമികളുടെ കണ്ടെത്തൽ.