പഞ്ചവർണ്ണ തത്തയ്ക്ക് റിലീസിന് മുൻപേ പൊന്നും വില..

മലയാളികളുടെ പ്രിയ ഹാസ്യ താരം രമേഷ് പിഷാരടി ആദ്യമായി സംവിധാനം ചെയ്ത പഞ്ചവർണ്ണ തത്ത റിലീസിന് ഒരുങ്ങുകയാണ്. ചിത്രത്തിന്റെ സാറ്റലൈറ്റ് അവകാശങ്ങൾ ആണ് വൻ തുകയ്ക്ക് വിറ്റു പോയിരിക്കുന്നത്. ചിത്രത്തിന്റെ സാറ്റലൈറ്റ് അവകാശങ്ങൾക്ക് ആയി നിരവധി ചാനലുകൾ ആയിരുന്നു രംഗത്തു എത്തിയിരുന്നത് എങ്കിലും ചിത്രം മഴവിൽ മനോരമയാണ് സ്വന്തമാക്കിയത്. 3.92 കോടി രൂപയ്ക്കാണ് ചിത്രം മഴവിൽ മനോരമ സ്വന്തമാക്കിയത്. റിലീസിന് മുൻപ് തന്നെ ഇത്രയേറെ വലിയ തുകയ്ക്ക് ചിത്രം സ്വന്തമാക്കുക എന്നത് തന്നെ ചിത്രത്തിന്റെ വിജയ പ്രതീക്ഷ ഇരട്ടി ആക്കിയിരിക്കുകയാണ്. ചെറിയ ബജറ്റിൽ ഒരുക്കിയ ചിത്രത്തിന് ഇത്രയേറെ തുകയ്ക്ക് സ്വന്തമാക്കിയത് ഈ വര്ഷം ഇതാദ്യം ആണ്.

ജയറാമും കുഞ്ചാക്കോ ബോബനും നായകന്മാർ ആയി എത്തുന്ന ചിത്രത്തിന്റെ ട്രൈലെർ കഴിഞ്ഞ ദിവസം പുറത്തിറങ്ങിയിരുന്നു. ജയറാമിന്റെ കരിയറിലെ ഇന്നേ വരെ കാണാത്ത വേഷവും ശബ്ദാവതരണത്തിലൂടെയും ഞെട്ടിച്ച ട്രൈലെർ വളരെ മികച്ച പ്രതികരണങ്ങൾ ആണ് നേടിയത്. ഇത് തന്നെ ആയിരിക്കണം ചിത്രത്തിന്റെ സാറ്റലൈറ്റ് അവകാശത്തിനു വേണ്ടി ഉള്ള ആവശ്യകതയ്ക്കും കാരണം. ഫാമിലി കോമഡി ചിത്രം ആയി എത്തുന്ന ചിത്രത്തിന്റെ രചിച്ചിരിക്കുന്നത് രമേഷ് പിഷാരടിയും ഹരി പി നായരും ചേർന്നാണ്. നടനും നിർമ്മാതാവും ആയ മണിയൻ പിള്ള രാജു നിർമ്മിച്ച ചിത്രത്തിൽ അനുശ്രീ ആണ് നായിക. ധർമജൻ, അശോകൻ, മല്ലിക സുകുമാരൻ തുടങ്ങിയവർ അഭിനയിച്ചിരിക്കുന്നു. ചിത്രത്തിൽ മനുഷ്യരെ പോലെ തന്നെ മൃഗങ്ങൾക്കും പ്രാധാന്യം നൽകി ഒരുക്കിയ ചിത്രം കുട്ടികളെ കൂടി ആകർഷിക്കും. ചിത്രം വിഷു റിലീസ് ആയി തീയറ്ററുകളിൽ എത്തുന്നു.