സോഷ്യൽ മീഡിയയുടെ പ്രശംസ പിടിച്ചു പറ്റി ‘റാന്തൽ’ പ്രേക്ഷക മനസ്സിൽ വെളിച്ചം വിതറുന്നു..!

ഏതാനും ദിവസങ്ങൾക്കു മുൻപ് റിലീസ് ചെയ്ത മലയാളം ഷോർട് ഫിലിം ആണ് നവാഗതനായ സുജിത് ഗോവിന്ദൻ സംവിധാനം ചെയ്ത റാന്തൽ. ഇപ്പോഴിതാ ഈ ഹൃസ്വ ചിത്രം സോഷ്യൽ മീഡിയയുടെ പ്രശംസ നേടിക്കൊണ്ട് തരംഗമായി മാറുകയാണ്. . യൂട്യൂബ് ട്രെൻഡിങ്ങിൽ നാലാം സ്ഥാനത്തു വരെ ഈ ഹൃസ്വ ചിത്രം ആദ്യ രണ്ടു ദിവസങ്ങൾക്കുള്ളിൽ എത്തി എന്നത് ഒരു വലിയ നേട്ടം തന്നെ ആയിരുന്നു. ഇപ്പോഴും യൂട്യൂബ് ട്രെൻഡിങ് ലിസ്റ്റിൽ നിലനിൽക്കുന്ന ഈ ഹൃസ്വ ചിത്രം ഇതിനോടകം മൂന്നരലക്ഷത്തോളം ആളുകൾ ആണ് കണ്ടു കഴിഞ്ഞത്.

അഞ്ചു ലക്ഷം ബഡ്ജറ്റിൽ ഒരു സിനിമ പോലെ മികച്ച സാങ്കേതിക നിലവാരത്തോടെ ഒരുക്കിയതാണ് ഈ ഹൃസ്വ ചിത്രത്തിന്റെ ഏറ്റവും വലിയ മേന്മകളിൽ ഒന്ന്. അതുപോലെ പ്രേക്ഷകന്റെ മനസ്സിൽ ആകാംഷ ജനിപ്പിക്കുന്ന അവതരണ ശൈലിയും ഈ ഷോർട് ഫിലിമിന് മുതൽക്കൂട്ടായിട്ടുണ്ട്. അത്തരത്തിൽ ഈ ഹൃസ്വ ചിത്രം അവതരിപ്പിക്കാൻ കഴിഞ്ഞതിൽ സംവിധായകൻ സുജിത് ഗോവിന്ദൻ തീർച്ചയായും അഭിനന്ദനം അർഹിക്കുന്നു.

പ്രശസ്ത മലയാള സിനിമ താരങ്ങളായ ബാലാജി ശർമ്മ, കൃഷ്ണൻ ബാലകൃഷ്ണൻ , രാധിക വേണുഗോപാൽ എന്നിവരാണ് ഈ ഹൃസ്വ ചിത്രത്തിൽ പ്രധാന വേഷങ്ങളിൽ എത്തിയിരിക്കുന്നത്. മൂന്നു കഥാപാത്രങ്ങൾ മാത്രമുള്ള ഈ ഷോർട് ഫിലിമിന് തിരക്കഥ ഒരുക്കിയിരിക്കുന്നത് അരുൺ എ ആർ , അജയ് രാഹുൽ എന്നിവർ ചേർന്നാണ്. ഓൺലൈൻ മീഡിയ അസോസിയേഷൻ ആണ് റാന്തൽ നിർമ്മിച്ചിരിക്കുന്നത്.

ഈ ഹൃസ്വ ചിത്രത്തിന് സാങ്കേതികമായി ഉയർന്ന നിലവാരം പകർന്നു നൽകിയതിൽ പ്രധാന പങ്കു വഹിച്ചത് ഫെയ്‌സ് സിദ്ദിഖ് ഒരുക്കിയ ദൃശ്യങ്ങൾ ആണ് . ആകാശ് ജോസഫ് വർഗീസ് എഡിറ്റിംഗ് നിർവഹിച്ചിരിക്കുന്ന റാന്തലിനു സംഗീതം പകർന്നിരിക്കുന്നത് ജയ്‌ഹരി പി എസ് ആണ്.