ആദ്യം കൈയ്യിൽ, പിന്നെ തലയിലായ അതിഥി താരത്തിന് സംവിധായകൻ വക പ്രതിഫലം തേങ്ങാ കഷ്ണം.

ഒറ്റഷോട്ടിൽ അഭിനയിക്കാൻ വന്ന അതിഥി താരം നിമിഷ നേരം കൊണ്ട് തന്നെ സംവിധായകന്റെ തലയിൽ കയറി, സംവിധായകൻ കൊടുത്ത തേങ്ങാ കഷ്ണവും ശാപ്പിട്ട് മടങ്ങി. ഞെട്ടേണ്ട കഥ മുഴുവനും ആയിട്ടില്ല മലയാളികളുടെ പ്രിയങ്കരനായ രമേഷ് പിഷാരടിസംവിധാനം ചെയ്യുന്ന പഞ്ചവർണ്ണ തത്തയുടെ സെറ്റാണ് സംഭവങ്ങൾക്കെല്ലാം ഉറവിടം. പേര് സൂചിപ്പിക്കുന്ന പോലെ തന്നെ പക്ഷി മൃഗാദികൾക്ക് പ്രാധാന്യം നൽകി ഒരുക്കിയ ചിത്രം തന്നെയാണ് പഞ്ചവർണ്ണ തത്ത ചിത്രത്തിൽ അഭിനയിക്കാനായി കഴിഞ്ഞ ദിവസം ഒരു കുഞ്ഞൻ എലി സെറ്റിൽ എത്തുകയുണ്ടായി. സെറ്റിൽ ചുരുങ്ങിയ നേരം കൊണ്ട് എല്ലാവർക്കും പ്രിയങ്കരനായി മാറിയ എലിയെ പിഷാരടി താലോലിക്കുന്ന ചിത്രങ്ങൾ ആണ് സോഷ്യൽ മീഡിയയിലൂടെ പങ്കു വച്ചത്. ആദ്യം കൈകളിൽ ആയിരുന്നു എങ്കിൽ പിന്നീട് പിഷാരടിയുടെ തലയിലേക്ക് എലി കയറി ഇരിപ്പ് ഉറപ്പിച്ചു.

പിഷാരടി പങ്ക് വച്ച ചിത്രങ്ങൾക്ക് അടിക്കുറിപ്പ് ആയി രസികന്മാർ കമന്റുകളിൽ നിറയുകയാണ്. ചിത്രത്തിലെ സുപ്രധാന ഷൂട്ടിനു ശേഷം എലിയ്ക് ഒരു തേങ്ങാ കഷ്ണവും പിഷാരടി നൽകുകയുണ്ടായി. ചിത്രത്തിൽ നായകന്മാർ ആയി എത്തുന്ന ജയറാമിനും കുഞ്ചാക്കോ ബോബനും ഒപ്പം കഥയിൽ പ്രാധാന്യത്തോടെ തന്നെ പക്ഷി മൃഗാദികളും എത്തുന്നുണ്ട്. മൃഗങ്ങളെ വാടകയ്ക്ക് കൊടുത്തു ജീവിക്കുന്ന ഒരു വ്യക്തിയുടെയും അദ്ദേഹത്തിന്റെ ജീവിതത്തിലേക്ക് കടന്നു വരുന്ന ഒരു യുവ രാഷ്ട്രീയക്കാരന്റെയും കഥയാണ് ചിത്രം പറയുന്നത്. കഥാപാത്രത്തിനായി ഇന്നുവരെ കാണാത്ത മേക്കോവർ ആണ് ജയറാം ചിത്രത്തിന് വേണ്ടി ചെയ്തിരിക്കുന്നത്. പിഷാരടിയുടെ സഹപ്രവർത്തകൻ കൂടി ആയിരുന്ന ഹരി പി നായരാണ് ചിത്രത്തിന്റെ തിരക്കഥ. ഗാനങ്ങൾക്ക് ഔസേപ്പച്ചൻ ഈണം പകരുന്നു. ഫാന്റസിയുടെ മേമ്പൊടിയോടെ ഒരുക്കുന്ന ചിത്രം ഒരു ഫാമിലി കോമഡി എന്റർടൈനർ ആണ്. മണിയൻ പിള്ള രാജു ഫിലിംസിന് വേണ്ടി മണിയൻ പിള്ള രാജു നിർമ്മിക്കുന്ന ചിത്രം വിഷുവിന് തീയേറ്ററുകളിൽ എത്തുന്നു.