ഉലകനായകന്റെ മുന്നിലും രാകേഷ് ഉണ്ണിയുടെ പാട്ട്; ഈ മലയാളി പുതിയ സോഷ്യൽ മീഡിയ സെൻസേഷൻ..!

രാകേഷ് ഉണ്ണി എന്ന മലയാളിയെ കുറച്ചു ദിവസം മുൻപ് വരെ ആർക്കും അറിയില്ലായിരുന്നു. എന്നാൽ ഇന്ന് കേരളത്തിലെ ഓരോ സംഗീത പ്രേമിക്കും സോഷ്യൽ മീഡിയയിൽ ആക്റ്റീവ് ആയവർക്കും രാകേഷ് ഉണ്ണിയെ അറിയാം. രാകേഷ് ഉണ്ണിയുടെ മനോഹരമായ ശബ്ദവും ഗാനവുമാണ് ഇന്ന് ഇദ്ദേഹത്തെ സോഷ്യൽ മീഡിയ സെൻസേഷൻ ആക്കുന്നത്. കയറ്റിറക്കു തൊഴിലാളി ആയ രാകേഷ് ഉണ്ണി ജോലിക്കിടെ വിശ്രമിക്കുമ്പോൾ പാടിയ ഒരു ഗാനം മൊബൈൽ വീഡിയോ ആയി സോഷ്യൽ മീഡിയയിൽ എത്തുകയും അത് വളരെ വേഗം എല്ലാവരുടെയും ശ്രദ്ധ പിടിച്ചു പറ്റുകയും ചെയ്തു.

അദ്ദേഹത്തിന്റെ ആലാപനം കേട്ട് അത്ഭുതപെട്ട സംഗീത സംവിധായകൻ ഗോപി സുന്ദർ അദ്ദേഹത്തെ കണ്ടു പിടിച്ചു കൊടുക്കണമെന്നും ഈ ഗായകനെ കൊണ്ട് തന്റെ ഗാനം സിനിമയിൽ പാടിക്കണം എന്നും ഫേസ്ബുക് പോസ്റ്റ് ഇട്ടു. ഇപ്പോഴിതാ സാക്ഷാൽ ഉലകനായകൻ കമല ഹാസന്റെ മുന്നിലും രാകേഷ് ഉണ്ണി പാടിയിരിക്കുകയാണ്.

എല്ലാം വളരെ പെട്ടെന്ന് ആയിരുന്നു. മോഹൻലാലിന്റെ ബ്രഹ്മാണ്ഡ ചിത്രമായ ഒടിയനിൽ പാടാൻ അവസരം ലഭിച്ച രാമനുണ്ണിക്ക്‌ അതോടൊപ്പം തന്നെ താൻ ഏറെ ആരാധിക്കുന്ന ശങ്കർ മഹാദേവന് വേണ്ടിയും പാടാൻ സാധിച്ചു. ശങ്കർ മഹാദേവൻ രാകേഷ് ഉണ്ണിയെ നേരിട്ട് വിളിച്ചു അഭിനന്ദിച്ചിരുന്നു. ശങ്കർ മഹാദേവൻ സംഗീതം നൽകി ആലപിച്ച “നീ ഇല്ലാമൈ നാൻ..” എന്ന ഗാനമാണ് രാകേഷ് ഉണ്ണി ആലപിച്ചത്. വിശ്വരൂപം എന്ന ചിത്രത്തിൽ കമല ഹാസൻ അഭിനയിച്ച ഗാനമാണ് ഇത്. അദ്ദേഹം തന്നെയാണ് ഈ ഗാനത്തിന് രചനയും നിർവഹിച്ചത്.

ചുരുങ്ങിയ ദിവസങ്ങൾ കൊണ്ട് മോഹൻലാൽ ചിത്രത്തിന്റെ ഭാഗമായ രാകേഷ് ഉണ്ണി ശങ്കർ മഹാദേവന്റെയും കമല ഹാസന്റെയും മുന്നിലും എത്തിക്കൊണ്ടു ഇപ്പോൾ മലയാളികളുടെ അഭിമാനം ആയി മാറിയിരിക്കുകയാണ്.