രജനികാന്ത് ചിത്രം ജയിലർ പുതിയ റിലീസ് ഡേറ്റിലേക്ക്; എത്തുന്നത് വമ്പൻ താരനിരയുമായി

സൂപ്പർസ്റ്റാർ രജനികാന്തിനെ നായകനാക്കി നെൽസൺ ദിലീപ്കുമാർ സംവിധാനം ചെയ്യുന്ന ചിത്രമാണ് ജയിലർ. കോലമാവ്‌ കോകില, ഡോക്ടർ, ബീസ്റ്റ് എന്നീ ചിത്രങ്ങൾക്ക് ശേഷം നെൽസൺ ഒരുക്കുന്ന ഈ ചിത്രം നിർമ്മിക്കുന്നത് സൺ പിക്ചേഴ്സ് ആണ്. ഈ വരുന്ന ഏപ്രിൽ പതിനാലിന് ജയിലർ റിലീസ് ചെയ്യുമെന്നാണ് പ്രതീക്ഷിച്ചിരുന്നതെങ്കിലും, ഷൂട്ടിംഗ് തീരാൻ വൈകുമെന്നതിനാൽ ഇപ്പോഴിതിന്റെ റിലീസ് ഡേറ്റ് മാറ്റിയിരിക്കുകയാണ്. ഏറ്റവും പുതിയ റിപ്പോർട്ടുകൾ അനുസരിച്ച് ഈ വർഷം ഓഗസ്റ്റ് പതിനൊന്നിന് ആണ് ജയിലർ റിലീസ് ചെയ്യാൻ പോകുന്നത്. ആ സമയത്ത് മറ്റ് വമ്പൻ തമിഴ് ചിത്രങ്ങൾ റിലീസ് പ്രഖ്യാപിച്ചിട്ടില്ല എന്നതും സ്വാതന്ത്ര്യ ദിനത്തിന്റെ അവധി കൂടി ഉൾപ്പെടുന്ന വീക്കെൻഡ് ആണെന്നതും ജയിലറിന്റെ ഒരു മെഗാ റിലീസിനാണ് കളമൊരുക്കുന്നത്. രജനികാന്ത് കൂടാതെ വലിയ താരനിരയാണ് ഈ ചിത്രത്തിൽ അണിനിരക്കുന്നത്.

മലയാളത്തിന്റെ മഹാനടൻ, കംപ്ലീറ്റ് ആക്ടർ മോഹൻലാൽ ഈ ചിത്രത്തിൽ അതിഥി താരമായി എത്തുന്നുണ്ട് എന്ന വാർത്ത പുറത്ത് വന്നതോടെ ഈ ചിത്രത്തിന്റെ ഹൈപ്പ് വളരെയധികം വർധിച്ചിട്ടുണ്ട്. മോഹൻലാൽ കൂടാതെ, കന്നഡ സൂപ്പർ താരം ശിവരാജ് കുമാറും ഇതിൽ അതിഥി വേഷം ചെയ്യുന്നുണ്ട്. രമ്യ കൃഷ്ണൻ, യോഗി ബാബു, മലയാള നടൻ വിനായകൻ, വസന്ത് രവി എന്നിവരും വേഷമിടുന്ന ഈ ചിത്രത്തിൽ പുഷ്പയിലെ വില്ലൻ വേഷം ചെയ്ത നടൻ സുനിൽ, പ്രശസ്ത തെന്നിന്ത്യൻ നായികയായ തമന്ന എന്നിവരും അഭിനയിക്കുന്നുണ്ട്. അനിരുദ്ധ് രവിചന്ദര്‍ സംഗീതം പകരുന്ന ഈ ചിത്രത്തിന് ഛായാഗ്രഹണം നിര്‍വ്വഹിക്കുന്നത് വിജയ് കാര്‍ത്തിക് കണ്ണനാണ്. മുത്തുവേൽ പാണ്ഡ്യൻ എന്ന കഥാപാത്രമായാണ് സൂപ്പർസ്റ്റാർ രജനികാന്ത് ഈ ചിത്രത്തിൽ അഭിനയിക്കുന്നത്.