കലാകാരന്മാരുടെ ആത്മാർത്ഥ ശ്രമത്തെ ചില വ്യക്തിവിരോധങ്ങളുടെ പേരിൽ കാണാതിരിക്കരുത്; ശ്രദ്ധ നേടി വലിയ പെരുന്നാളിനെ കുറിച്ച് രാജീവ് രവിയുടെ വാക്കുകൾ

യുവ താരം ഷെയിൻ നിഗം നായകനായ വലിയ പെരുന്നാൾ എന്ന ചിത്രം ഇപ്പോൾ മികച്ച അഭിപ്രായങ്ങൾ നേടി തീയേറ്ററുകളിൽ മുന്നേറുകയാണ്. നവാഗതനായ ഡിമൽ ഡെന്നിസ് സംവിധാനം ചെയ്ത ഈ ചിത്രത്തിൽ ബോളിവുഡ് നടി ഹിമിക ബോസ് ആണ് നായികാ വേഷം ചെയ്ത ഈ ചിത്രം കൊച്ചി- മട്ടാഞ്ചേരി പ്രദേശത്തു നടക്കുന്ന കഥ ആയാണ് അവതരിപ്പിച്ചിരിക്കുന്നത്. ജോജു ജോർജ്, സൗബിൻ ഷാഹിർ, വിനായകൻ എന്നിവരും അഭിനയിച്ച ഈ ചിത്രത്തിന് സംഗീതം ഒരുക്കിയത് റെക്‌സ് വിജയൻ ആണ്. ഷെയിൻ നിഗമിന്റെ മികച്ച പ്രകടനം ആണ് ഈ ചിത്രത്തിന്റെ ഹൈലൈറ്റ്. ഇപ്പോഴിതാ ഈ ചിത്രത്തെ കുറിച്ചു പ്രശസ്ത സംവിധായകനും ഛായാഗ്രാഹകനും ആയ രാജീവ് രവി പറഞ്ഞ വാക്കുകൾ ആണ് ശ്രദ്ധ നേടുന്നത്. തന്റെ ഫേസ്ബുക്ക് പേജ് വഴി ആണ് അദ്ദേഹം പ്രതികരണം അറിയിച്ചത്.

അദ്ദേഹത്തിന്റെ വാക്കുകൾ ഇങ്ങനെ: സിനിമയെന്ന കലാരൂപത്തെ വർണ്ണ/ജാതി – മത വേർതിരിവുകൾക്കപ്പുറം ആസ്വദിക്കുന്നവരാണ് നമ്മളെല്ലാവരും. ഒരു സിനിമ അതിന്റെ സത്യത്തിൽ നിന്നുകൊണ്ട് കാണാനും അംഗീകരിക്കാനും തയ്യാറാകണം. വലിയപെരുന്നാളിൽ നല്ലൊരു സിനിമ ഒരുക്കാനുള്ള എല്ലാ ശ്രമങ്ങളും നമുക്ക് കാണാൻ സാധിക്കും. അതിന്റെ അണിയറക്കാർ ഈ ചിത്രത്തെ മനോഹരമായാണ് ഒരുക്കിയിരിക്കുന്നത്. ഒരുപറ്റം കലാകാരന്മാരുടെ ആത്മാർത്ഥ ശ്രമത്തെ ചില വ്യക്തിവിരോധങ്ങളുടെ പേരിൽ കാണാതിരിക്കരുത്. അതിനു വേണ്ടി എടുത്ത അവരുടെ ശ്രമങ്ങളെ നിഷ്കരുണം തള്ളരുത്. ആ പ്രവണത നമ്മുടെ സിനിമയ്ക്കും ഭാഷയ്ക്കുമൊന്നും ഒരു തരത്തിലും ഗുണം ചെയ്യില്ല. മറിച്ച് ദോഷം ചെയ്യും.