ചിയാൻ വിക്രം കർണൻ ആകുന്നു, സംവിധാനം ആർ എസ് വിമൽ..!

പ്രശസ്ത സൗത്ത് ഇന്ത്യൻ സൂപ്പർ സ്റ്റാർ ചിയാൻ വിക്രം കർണൻ ആയി എത്തുന്നു. മഹാവീർ കർണ്ണ എന്ന് പേരിട്ടിരിക്കുന്ന ഈ ചിത്രം ഹിന്ദിയിൽ ആണ് ഒരുക്കുന്നത്. എന്ന് നിന്റെ മൊയ്‌ദീൻ എന്ന ബ്ലോക്ക്ബസ്റ്റർ ചിത്രത്തിലൂടെ സംവിധായകനായി അരങ്ങേറിയ ആർ എസ് വിമൽ ആണ് ഈ ചിത്രം സംവിധാനം ചെയ്യാൻ പോകുന്നത്. ഈ വർഷം ഒക്ടോബറിൽ ചിത്രീകരണം ആരംഭിക്കുന്ന മഹാവീർ കർണ്ണ അടുത്ത വർഷം ഡിസംബറിൽ ആയിരിക്കും റിലീസ് ചെയ്യുക. യുണൈറ്റഡ് ഫിലിം കിങ്ഡം ന്യൂ യോർക്ക് ആണ് ഈ ചിത്രം നിർമ്മിക്കുന്നത്. ഇവരുടെ ആദ്യത്തെ നിർമ്മാണ സംരംഭമാണ് ഈ ബിഗ് ബജറ്റ് പ്രൊജക്റ്റ്. 300 കോടി രൂപ മുതൽ മുടക്കിൽ ആയിരിക്കും ഈ ചിത്രം നിർമ്മിക്കുക എന്നാണ് റിപ്പോർട്ടുകൾ പറയുന്നത്. മറ്റു ഭാഷകളിലും ഈ ചിത്രം പ്രദർശനത്തിന് എത്തുമെന്നാണ് ആർ എസ് വിമൽ അറിയിച്ചിരിക്കുന്നത് . ആദ്യം എത്തുക ഹിന്ദി വേർഷൻ ആയിരിക്കും.

വിക്രമിന് പുറമെ ഇന്ത്യൻ സിനിമയിലെ പ്രമുഖ താരങ്ങളും ലോകമെമ്പാടുനിന്നുമുള്ള പ്രശസ്തരായ സാങ്കേതിക പ്രവർത്തകരും ഈ ചിത്രത്തിൽ അണി നിരക്കും. പക്ഷെ ഇപ്പോൾ ഓരോ മലയാളികളുടെ മനസ്സിലും വന്നിരിക്കുന്ന ചോദ്യം ആർ എസ് വിമൽ- പ്രിത്വി രാജ് ടീം ഒന്നിക്കുമെന്നു പറഞ്ഞ കർണൻ എന്ന പ്രോജെക്ടിനെ കുറിച്ചാണ് . പ്രിത്വി രാജിനെ നായകനാക്കി മുന്നൂറു കോടി രൂപ ബഡ്ജറ്റിൽ ആർ എസ് വിമൽ കർണ്ണൻ ഒരുക്കുമെന്നാണ് നേരത്തെ പ്രഖ്യാപിച്ചിരുന്നത്. അതിനായി ഈ ചിത്രത്തിന്റെ പ്രീ-പ്രൊഡക്ഷൻ ജോലികളും ഹൈദരാബാദിൽ ആരംഭിച്ചിരുന്നു.

കുറച്ചു നാള് മുൻപേ കൂടിയും പ്രിത്വി രാജ് പറഞ്ഞത് കർണ്ണൻ സംഭവിക്കുമെന്നും അതുപോലെ ബഹുഭാഷാ ചിത്രമായി എത്തുമെന്നുമാണ്. ഇപ്പോൾ പ്രിത്വി രാജ് ഈ പ്രോജക്ടിന്റെ ഭാഗമാണോ എന്നുപോലും അറിയില്ല. ഇനി മലയാളം വേർഷനിൽ പ്രിത്വി രാജ് നായകനും മറ്റു വേർഷനുകളിൽ വിക്രവുമാണോ എന്ന സംശയവും ആരാധകർ ഉന്നയിക്കുന്നു.