പ്രേക്ഷകർക്കൊപ്പം സിനിമ പ്രവർത്തകരുടെയും കയ്യടി നേടി ക്വീൻ മുന്നേറുന്നു..!

ഈ വർഷത്തെ മലയാളത്തിലെ ആദ്യത്തെ സൂപ്പർ ഹിറ്റ് ഏതെന്നു ചോദിച്ചാൽ ധൈര്യമായി നമ്മുക്ക് പറയാം അത് ക്വീൻ എന്ന ചിത്രമാണെന്ന്. പുതുമുഖങ്ങൾ അഭിനയിച്ച, പുതുമുഖങ്ങൾ ഒരുക്കിയ ഈ ചിത്രം പ്രേക്ഷകരുടെ ഗംഭീര അഭിപ്രായങ്ങളുടെ പിന്തുണയുടെ ബോക്സ് ഓഫീസിൽ കുതിക്കുകയാണ് ഇപ്പോൾ. ചെറിയ ബഡ്ജറ്റിൽ ഒരുക്കിയ ഈ ചിത്രം വമ്പൻ വിജയം ആണ് നേടുന്നത്. ഒരു ക്യാമ്പസ് ത്രില്ലർ ആയി ഒരുക്കിയ ഈ ചിത്രം ആദ്യം യുവാക്കൾ ആണ് ഇരുകയ്യും നീട്ടി സ്വീകരിച്ചത് എങ്കിൽ ഇപ്പോൾ കുടുംബ പ്രേക്ഷകരും ചിത്രം കാണാൻ എത്തി തുടങ്ങിയത് വലിയ നേട്ടം ആണ് ക്വീനിനു സമ്മാനിക്കുന്നത്. പ്രേക്ഷകരും നിരൂപകരും മാത്രമല്ല സിനിമ മേഖലയിൽ നിന്നുള്ളവരും കയ്യടികളോടെയാണ് ഈ ചിത്രത്തെ സ്വീകരിച്ചിരിക്കുന്നത് .

ഈ ചിത്രത്തിന് ആദ്യം അഭിനന്ദനങ്ങളുമായി എത്തിയത് ആട് 2 എന്ന ബ്ലോക്ക്ബസ്റ്റർ ചിത്രം നമ്മുക്ക് കഴിഞ്ഞ മാസം സമ്മാനിച്ച മിഥുൻ മാനുവൽ തോമസ് ആണ്. തന്റെ ഫേസ്ബുക് പേജിലൂടെയാണ് ഈ ചിത്രം കണ്ടതിനു ശേഷം ഇതിന്റെ അണിയറ പ്രവർത്തകരെ അഭിനന്ദിച്ചു കൊണ്ട് മിഥുൻ മാനുവൽ തോമസ് പോസ്റ്റ് ഇട്ടതു. അതിനു ശേഷം ഈ ചിത്രത്തെ അഭിനന്ദിച്ചു രംഗത്ത് വന്നത് പ്രശസ്ത സംവിധായകൻ ജിബു ജേക്കബ് ആണ്. ഒരുപറ്റം യുവാക്കൾ ചേർന്ന് ഒരുക്കിയ ഈ ചിത്രത്തെ അദ്ദേഹവും സോഷ്യൽ മീഡിയ പേജിലൂടെ അഭിനന്ദിച്ചു. പിന്നീട് എത്തിയത് നടൻ സണ്ണി വെയ്‌നിന്റെ അഭിനന്ദനമാണ്. നവാഗതനായ ഡിജോ ജോസ് ആന്റണി ഒരുക്കിയ ഈ ചിത്രം രചിച്ചത് ഷാരിസ് മുഹമ്മദ്, ജിബിൻ ജോസ് ആന്റണി എന്നിവർ ചേർന്നാണ്. ഈ ചിത്രത്തിലെ ഒരു ഗംഭീര അതിഥി വേഷത്തിലൂടെ നടൻ സലിം കുമാറും പ്രേക്ഷകരുടെ കയ്യടി ഏറെ നേടിയെടുക്കുന്നുണ്ട്. ബോക്സ് ഓഫീസിൽ ഇപ്പോഴും ക്വീൻ മികച്ച കളക്ഷൻ നേടി മുന്നേറുന്ന കാഴ്ചയാണ് നമ്മുക്ക് കാണാൻ കഴിയുന്നത്.