മുഖം വ്യക്തമാക്കാതെ റോയൽ മെക്കിലെ പെൺകുട്ടി ; ക്വീൻ ഫസ്റ്റ്ലുക്ക് പോസ്റ്റർ പുറത്ത്

എഞ്ചിനീയറിംഗ് വിദ്യാര്‍ഥികളുടെ കഥ പറയുന്ന പുതുമുഖ ചിത്രം ‘ക്വീനി’ന്റെ ഫസ്റ്റ്ലുക്ക് പോസ്റ്റർ പുറത്ത്. ആണ്‍കുട്ടികളുടെ തട്ടകമായ മെക്കാനിക്കല്‍ എഞ്ചിനീയറിംഗ് പഠിക്കാന്‍ ഒരു പെണ്‍കുട്ടി എത്തുന്നതും അതിനെ തുടര്‍ന്നുണ്ടാകുന്ന സംഭവവികാസങ്ങളുമാണ് ചിത്രത്തിന്റെ പ്രമേയം. ഡിജോ ജോസ് ആന്റണിയാണ് ചിത്രത്തിന്റെ സംവിധാനം. ചിത്രത്തിന്റെ മോഷൻ പോസ്റ്ററും ട്രെയിലറും സിനിമാപ്രേമികളുടെ ശ്രദ്ധ പിടിച്ചുപറ്റിയിരുന്നു.

ആദ്യ സിനിമയാണ്, സ്വപ്‌നമാണ്, പുതിയ പിള്ളേരാണ്, മിന്നിച്ചേക്കണം എന്ന വോയിസ് ഓവറിലൂടെ തുടങ്ങുന്ന മേക്കിങ് വീഡിയോയും കോളേജ് വിദ്യാർഥികൾ ഉൾപ്പെടെയുള്ളവർ ഏറ്റെടുത്തു. മേക്കിങ് വീഡിയോയിൽ പരിചയപ്പെടുത്തിയ ‘ആരാണ്ടാ ആരാണ്ടാ ഞാന്‍ റോയല്‍ മെക്കാണ്ടാ’ എന്നുതുടങ്ങുന്ന മെക്ക് ആന്തവും വൈറലായിരുന്നു.

അജേയ് ശ്രാവണും കേശവും ജേക്‌സും ചേര്‍ന്നാണ് ഗാനം ആലപിച്ചിട്ടുള്ളത്. പുറത്തിറങ്ങി മണിക്കൂറുകൾക്കുള്ളിൽ തന്നെ ഹിറ്റായ ഈ ഗാനം ഏറെക്കാലത്തേക്ക് കോളെജുകളിലെ മെക്കാനിക്കല്‍ വിദ്യാര്‍ത്ഥികളുടെ ഔദ്യോഗിക ഗാനമാകാനുള്ള സാധ്യതയും കുറവല്ല.

എന്നാല്‍ ട്രെയിലറിലെ മേക്കിങ് വീഡിയോയിലുമെല്ലാം ചിത്രത്തിലെ നായികയെ സംബന്ധിച്ച വിവരങ്ങൾ സസ്പെൻസ് ആയിത്തന്നെയാണ് സൂക്ഷിച്ചിരിക്കുന്നത്. ക്യാമ്പസ് രാഷ്ട്രീയവും ഡിപ്പാര്‍ട്ട്‌മെന്റുകള്‍ തമ്മിലുള്ള മത്സരവും എല്ലാമടങ്ങിയ സമ്പൂര്‍ണ ക്യാമ്പസ് പാക്കേജ് തന്നെയാവും സിനിമയെന്നാണ് സൂചന.

മെക്കാനിക്കല്‍ എഞ്ചിനീയറന്‍മാരായ ജെബിന്‍, ജോസഫ് ആന്റണി, ഷാരിസ് മുഹമ്മദ് എന്നിവര്‍ ചേര്‍ന്നാണ് ചിത്രത്തിന്റെ തിരക്കഥ. ദ്രുവങ്ങള്‍ 16 സിനിമയുടെ അസോസിയേറ്റ് ക്യാമറാമാന്‍ സുരേഷ് ഗോപിയാണ് ക്യാമറ കെെകാര്യം ചെയ്തിരിക്കുന്നത്. എഡിറ്റിംഗ് നിര്‍വ്വഹിച്ചിരിക്കുന്നത് സാഗര്‍ ദാസാണ്. സംഗീതം നൽകിയിരിക്കുന്നത് ജേക്‌സ് ബിജോയ് ആണ്. ഷിബു കെ മൊയ്ദീനും റിന്‍ഷാദ് വെള്ളോടത്തിലും ചേർന്നാണ് ക്വീനിന്റെ നിർമ്മാണം. അറേബിയൻ ഡ്രീംസ് എന്റെർറ്റൈന്മെന്റിന്റെ ബാനറിൽ ആണ് ചിത്രം നിർമ്മിച്ചിരിക്കുന്നത്.