ബട്ടർഫ്ളൈസിൽ മോഹൻലാലിന്റെ ഇടി കൊണ്ട് വീണു, വില്ലനിൽ മോഹൻലാലിനെ കൊണ്ട് ഇടി കൊടുപ്പിച്ചു റാം ലക്ഷ്മൺ ടീം

മോഹൻലാൽ നായകനായി എത്തുന്ന ബി ഉണ്ണികൃഷ്ണൻ ചിത്രം വില്ലൻ ഈ മാസം ഒക്ടോബർ 27 നു പ്രദർശനത്തിന് എത്തുകയാണ്. മോഹൻലാൽ മാത്യു മാഞ്ഞൂരാൻ എന്ന റിട്ടയേർഡ് പോലീസ് ഉദ്യോഗസ്ഥനായി എത്തുന്ന ഈ ചിത്രം ഒരു സ്റ്റൈലിഷ് ക്രൈം ത്രില്ലർ ആയാണ് ഒരുക്കിയിരിക്കുന്നത്. റോക്ക് ലൈൻ വെങ്കടേഷ് നിർമ്മിച്ചിരിക്കുന്ന ഈ ബിഗ് ബജറ്റ് ചിത്രത്തിൽ മോഹൻലാലിനൊപ്പം തമിഴ് നടൻ വിശാലും മുഖ്യ വേഷത്തിൽ എത്തിയിരിക്കുന്നു.

നാല് ഫൈറ്റ് മാസ്റ്റേഴ്സ് ചേർന്നൊരുക്കിയിരിക്കുന്ന വമ്പൻ ആക്ഷൻ രംഗങ്ങൾ ആണ് ഈ ചിത്രത്തിന്റെ പ്രത്യേകതകളിൽ ഒന്ന്. രവി വർമ്മ, റാം-ലക്ഷ്മൺ ടീം, ജി എന്നിവരാണ് ആ നാല് സംഘട്ടന സംവിധായകർ. ഇതിൽ റാം-ലക്ഷ്മൺ ടീമിന് വളരെ ആവേശകരമായ ഒരു കഥ പറയാനുണ്ട് നമ്മളോട്. മോഹൻലാൽ എന്ന ഇതിഹാസത്തിനൊപ്പം ജോലി ചെയ്ത ഒരനുഭവത്തെ കുറിച്ച്.

1993 ഇൽ രാജീവ് അഞ്ചൽ മോഹൻലാലിനെ നായകനാക്കി ഒരുക്കിയ സൂപ്പർ ഹിറ്റ് ചിത്രമാണ് ബട്ടർഫ്‌ളൈസ്. ഈ ചിത്രത്തിന് വേണ്ടി സംഘട്ടനം ഒരുക്കിയത് അന്നത്തെ പ്രശസ്ത സംഘട്ടന സംവിധായകനായിരുന്നു പഴനിരാജ് ആയിരുന്നു. മോഹൻലാലിൻറെ കിടിലൻ സംഘട്ടന രംഗങ്ങൾ ഈ ചിത്രത്തിന്റെ പ്രത്യേകതയായിരുന്നു. ഈ ചിത്രത്തിൽ മോഹൻലാലിൻറെ ഇടി കൊണ്ട് വീണ ഗുണ്ടകളായി അഭിനയിച്ചവരിൽ ഇപ്പോൾ സൗത്ത് ഇന്ത്യ മുഴുവൻ അറിയപ്പെടുന്ന റാം- ലക്ഷ്മൺ ടീമും ഉണ്ടായിരുന്നു.

അന്ന് വെറും സ്റ്റണ്ട് മെൻ ആയി ജോലി ചെയ്ത അവർ ഇന്ന് വില്ലൻ എന്ന ചിത്രത്തിലൂടെ മോഹൻലാലിൻറെ ഫൈറ്റ് മാസ്റ്റർ ആയി എത്തി നിൽക്കുമ്പോൾ ഈ അഭിമാന നിമിഷത്തെ കുറിച്ച് പറയാൻ ഇരുവർക്കും വാക്കുകൾ കിട്ടുന്നില്ല.

തെലുങ്കിലെ വമ്പൻ ചിത്രങ്ങളായ ബാഹുബലി 2, മഗധീര , മിർച്ചി എന്നീ ചിത്രങ്ങളിൽ ഒക്കെ സംഘട്ടനം ഒരുക്കിയ ഇവർ തെലുങ്കിലെ സൂപ്പർ താര ചിത്രങ്ങളടക്കം ഒട്ടുമിക്ക ബിഗ് ബജറ്റ് ചിത്രങ്ങളുടെയും സംഘട്ടനം ഒരുക്കിയിട്ടുള്ളവരിൽ പ്രധാനികൾ ആണ്. പീറ്റർ ഹെയ്‌ൻ കഴിഞ്ഞാൽ തെലുങ്കിൽ ഏറ്റവും അധികം പേരും ആവശ്യപ്പെടുന്നത് റാം-ലക്ഷ്മൺ ടീമിന്റെ സാന്നിധ്യമാണ്. വില്ലൻ എന്ന ചിത്രത്തിലേക്കുള്ള ക്ഷണം ലഭിക്കുമ്പോൾ തന്നെ റാം-ലക്ഷ്മൺ ടീമിനെ ആവേശം കൊള്ളിച്ചത് മോഹൻലാൽ എന്ന ഇതിഹാസത്തിന്റെ സാന്നിധ്യം തന്നെയാണ്.

ആക്ഷൻ രംഗങ്ങളിൽ ഇത്രയധികം പെർഫെക്ഷൻ ഈ പ്രായത്തിലും കൊണ്ട് വരുന്ന സൂപ്പർ താരം സൗത്ത് ഇന്ത്യയിൽ തന്നെ വേറെ ഇല്ലെന്നു ഇതിഹാസമായ ത്യാഗരാജൻ മാസ്റ്റർ പോലും പറഞ്ഞ സത്യം റാം-ലക്ഷ്മൺ ടീമും ആവർത്തിക്കുന്നു.

വില്ലന്റെ സെറ്റിൽ വെച് മോഹൻലാലിനെ കാണാൻ ആവേശത്തോടെ കാത്തിരുന്ന നിമിഷങ്ങൾ ഇപ്പോഴും ഓർക്കുന്നു ഈ ടീം. മാത്രമല്ല മോഹൻലാലിനെ കണ്ടപ്പോൾ തങ്ങൾ പണ്ട് ബട്ടർഫ്‌ളൈസ് എന്ന ചിത്രത്തിൽ ഒപ്പം ജോലി ചെയ്ത കാര്യവും ഇവർ മോഹൻലാലിനെ ഓർമ്മിപ്പിച്ചു. ഏറെ സ്നേഹത്തോടെയും ബഹുമാനത്തോടെയുമാണ് മോഹൻലാൽ പെരുമാറിയതെന്നും മോഹൻലാലിനൊപ്പമുള്ള വർക്കിംഗ് എക്സ്പീരിയൻസ് ഒരിക്കലും മറക്കാൻ പറ്റില്ലെന്നും റാം- ലക്ഷ്മൺ ടീം പറയുന്നു.

ഏതായാലും വില്ലന് വേണ്ടി റാം-ലക്ഷം ടീം ഒരുക്കിയ തീ പാറുന്ന സംഘട്ടനം കാണാൻ നമ്മുക്ക് കാത്തിരിക്കാം ഒക്ടോബർ 27 വരെ.