വ്യക്തിത്വം ഇല്ലെങ്കിൽ നാവിൽ സരസ്വതി ഉണ്ടായിട്ടെന്തു കാര്യം; മാലാ പാർവതി വിവാദത്തിൽ പ്രതികരിച്ചു നടിയും നിർമ്മാതാവുമായ സാന്ദ്ര തോമസ്..!

വിജയ് ബാബുവിനൊപ്പം ഫ്രൈഡേ ഫിലിം ഹൌസ് എന്ന നിർമ്മാണ കമ്പനി രൂപീകരിച്ചു മുന്നോട്ടു വന്ന വനിതാ നിർമ്മാതാവാണ് സാന്ദ്ര തോമസ്. അതിനൊപ്പം ഒരു നടിയെന്ന നിലയിലും ശ്രദ്ധിക്കപ്പെട്ട സാന്ദ്ര തോമസ് ഇപ്പോൾ സിനിമയിൽ നിന്ന് മാറി കുടുംബ ജീവിതവുമായി മുന്നോട്ടു പോവുകയാണ്. എന്നാൽ കഴിഞ്ഞ ദിവസങ്ങളിൽ സോഷ്യൽ മീഡിയയിൽ നിറഞ്ഞു നിന്ന നടി മാലാ പാർവതിയുടെ മകനുമായി ബന്ധപ്പെട്ട വിവാദത്തിൽ സാന്ദ്ര തോമസ് നടത്തിയ പ്രതികരണം ഏറെ ശ്രദ്ധ നേടുകയാണ്. നടി മാലാ പാർവതിയുടെ മകൻ അനന്ത കൃഷ്ണൻ തനിക്കു സോഷ്യൽ മീഡിയയിലൂടെ വർഷങ്ങളായി അശ്‌ളീല സന്ദേശങ്ങൾ അയക്കുന്നു എന്ന് വെളിപ്പെടുത്തി ട്രാൻസ് വുമണും മേക്കപ്പ് ആർട്ടിസ്റ്റുമായ സീമ വിനീതാണ് രംഗത്ത് വന്നത്. ഫേസ്ബുക് ലൈവ് വീഡിയോയും അതിനു ശേഷം തെളിവുകൾ നിരത്തിയുള്ള പോസ്റ്റുമായും രംഗത്ത് വന്ന സീമ വിനീതിന് മറുപടിയുമായി മാലാ പാർവതിയും എത്തിയിരുന്നു.

ഏതായാലും ഈ വിഷയത്തിൽ സാന്ദ്ര തോമസിന്റെ വാക്കുകൾ മാലാ പാർവതിക്ക് എതിരായാണ് എത്തിയിരിക്കുന്നത്. ഒരു ഓൺലൈൻ മാധ്യമത്തിൽ വന്ന മാലാ പാർവതിയുടെ ഓഡിയോ സന്ദേശമാണ് തന്നെ ഈ കുറിപ്പ് എഴുതാൻ പ്രേരിപ്പിച്ചത് എന്നാണ് സാന്ദ്ര തോമസ് പറയുന്നത്. വ്യക്തിത്വം ഇല്ലെങ്കിൽ നാവിൽ സരസ്വതി ഉണ്ടായിട്ടെന്തു കാര്യം എന്നാണ് സാന്ദ്ര ചോദിക്കുന്നത്. മകൻ ചെയ്തതു തെറ്റാണെന്നു സോഷ്യൽ മീഡിയയിൽ സമ്മതിക്കുകയും, അതിനു ശേഷം അല്ലാതെ ഉള്ള പ്രൈവറ്റ് കോൺവെർസേഷൻസിൽ അവൻ ചെയ്തതിൽ എന്താ തെറ്റ് അതവന്റെ വ്യക്തി സ്വാതന്ത്ര്യം അല്ലേ എന്ന് മാലാ പാർവതി പറഞ്ഞതിനോടുമാണ് തനിക്കു അഭിപ്രായ വ്യത്യാസമുള്ളതെന്നു സാന്ദ്ര പറയുന്നു. സാന്ദ്ര തോമസിനെ അനുകൂലിച്ചും എതിർത്തും സിനിമാ മേഖലയിൽ നിന്ന് തന്നെ പലരും ആ ഫേസ്ബുക് പോസ്റ്റിൽ കമന്റുകളുമായി എത്തിയിട്ടുണ്ട്.