പൃഥ്വിരാജ് സുകുമാരന്റെ ബ്രഹ്മാണ്ഡ ചിത്രം കാളിയൻ ആരംഭിക്കുന്നു..!

മലയാളത്തിന്റെ യുവ സൂപ്പർ താരം പൃഥ്വിരാജ് സുകുമാരനെ നായകനാക്കി ഏതാനും വർഷങ്ങൾക്കു മുൻപ് പ്രഖ്യാപിച്ച ചിത്രമാണ് കാളിയൻ, ബ്രഹ്മാണ്ഡ ചിത്രമായി പ്രഖ്യാപിച്ച ഈ പ്രൊജക്റ്റ്, ഇതിന്റെ വലിപ്പം കാരണവും പിന്നീട് വന്ന കോവിഡ് സാഹചര്യങ്ങൾ കാരണവും നീണ്ടു പോവുകയായിരുന്നു. ഇപ്പോഴിതാ ഈ ചിത്രത്തിന്റെ പ്രീ പ്രൊഡക്ഷൻ ജോലികൾ നടക്കുകയാണ്. അതിന്റെ ഭാഗമായി ചിത്രത്തിലേക്കുള്ള കാസ്റ്റിംഗ് കാൾ വന്നിരിക്കുകയാണിപ്പോൾ. പൃഥ്വിരാജ് തന്നെയാണ് തന്റെ ഒഫീഷ്യൽ സോഷ്യൽ മീഡിയ പേജുകളിലൂടെ ഈ കാസ്റ്റിംഗ് കാൾ പുറത്തു വിട്ടിരിക്കുന്നത്. ചരിത്ര കഥാപാത്രങ്ങളുടെ രൂപഭാവങ്ങളുണ്ടോയെന്നും, ഉണ്ടെങ്കിൽ കാളിയനൊപ്പം കൂടാം, ചരിത്രത്തിന്റെ ഭാഗമാകാമെന്ന വാക്കുകളോടെയാണ് ഈ കാസ്റ്റിംഗ് കാൾ പുറത്തു വന്നിരിക്കുന്നത്. ഏഴു വയസ്സ് മുതൽ എഴുപതു വയസ്സു വരെയുള്ള ആണുങ്ങൾക്കും പെണ്ണുങ്ങൾക്കും ഈ ചിത്രത്തിൽ അവസരമുണ്ട്.

മെയ് പത്തൊൻപത്തിനും ഇരുപതിനുമായാണ് കൊച്ചി വൈ എം സി എ ഹാളിൽ വെച്ച് സ്പോട്ട് രെജിസ്ട്രേഷൻ നടക്കുകയെന്നും കാസ്റ്റിംഗ് കോളിൽ പറയുന്നുണ്ട്. ഇതിന്റെ തിരക്കഥ പൂർത്തിയായി ഇരിക്കുകയാണെന്നും ശ്രീലങ്ക, കർണാടകം എന്നിവിടങ്ങളിലെ ലൊക്കേഷനുകളും കണ്ടു കഴിഞ്ഞെന്നും പൃഥ്വിരാജ് നേരത്തെ പറഞ്ഞിരുന്നു. നവാഗതനായ എസ് മഹേഷ് സംവിധാനം ചെയ്യാൻ പോകുന്ന ഈ ചിത്രം, വേണാട് ചരിത്രത്തിലെ വീരപുരുഷനും പടത്തലവനുമായ ഇരവിക്കുട്ടിപ്പിള്ളയുടെയും, ആത്മ മിത്രം കുഞ്ചിറക്കോട്ട് കാളിയുടെയും കഥയാണ് പറയാൻ പോകുന്നത്. പ്രശസ്ത മാധ്യമപ്രവര്‍ത്തകനായ ബി ടി അനില്‍ കുമാര്‍ തിരക്കഥ രചിച്ചിരിക്കുന്ന ഈ ചിത്രം മാജിക് മൂണ്‍ പ്രൊഡക്ഷന്‍സിന്റെ ബാനറില്‍ രാജീവ് ഗോവിന്ദനാണ് നിർമ്മിക്കുക. സുജിത് വാസുദേവ് കാമറ ചലിപ്പിക്കാൻ പോകുന്ന ഈ ചിത്രത്തിന് സംഗീതം ഒരുക്കുന്നത് ശങ്കർ- ഇഹ്‌സാൻ- ലോയ്, കലാസംവിധാനം നിർവഹിക്കുന്നത് ബംഗ്ലാന്‍ എന്നിവരാണ്.