തങ്കം സംവിധായകനൊപ്പം പൃഥ്വിരാജ്; ഒപ്പം ജിത്തു മാധവനും?

മലയാളത്തിൻ്റെ യുവ സൂപ്പർതാരം പൃഥ്വിരാജ് ഇപ്പൊൾ തൻ്റെ വിലായത്ത് ബുദ്ധ എന്ന ചിത്രം തീർക്കുന്ന തിരക്കിലാണ്. ഇതിന് ശേഷം രാജമൗലി – മഹേഷ് ബാബു ചിത്രം, നിസാം ബഷീർ ഒരുക്കുന്ന നോബഡി, വിപിൻ ദാസ് ഒരുക്കുന്ന സന്തോഷ് ട്രോഫി, ബിഗ് ബജറ്റ് ചിത്രം കാളിയൻ, വൈശാഖ് ഒരുക്കുന്ന ഖലീഫ എന്നിവയാണ് അദ്ദേഹം ചെയ്യുക എന്നാണ് വാർത്തകൾ.

എന്നാൽ ഏറ്റവും പുതിയ വിവരങ്ങൾ പറയുന്നത് അടുത്ത വർഷം, മറ്റൊരു പുതിയ സംവിധായകനൊപ്പം കൂടി പൃഥ്വിരാജ് ഒന്നിച്ചേക്കാം എന്നാണ്. ബിജു മേനോൻ, വിനീത് ശ്രീനിവാസൻ എന്നിവർ പ്രധാന വേഷങ്ങൾ ചെയ്ത തങ്കം എന്ന ചിത്രമൊരുക്കി ശ്രദ്ധ നേടിയ സഹീദ് അറഫാത്ത് ഒരുക്കുന്ന പുതിയ ചിത്രത്തിൽ പൃഥ്വിരാജ് ആണ് നായകനെന്ന സ്ഥിരീകരിക്കാത്ത റിപ്പോർട്ടുകളുണ്ട്. ആവേശം, രോമാഞ്ചം എന്നീ ചിത്രങ്ങൾ സംവിധാനം ചെയ്ത ജിത്തു മാധവൻ ആണ് ഈ ചിത്രം രചിക്കുക എന്നാണ് സൂചന.

ആവേശത്തിന് ശേഷം മോഹൻലാൽ നായകനായ ബിഗ് ബജറ്റ് ചിത്രം ഒരുക്കാനുള്ള തയ്യാറെടുപ്പിലാണ് ജിത്തു. ഗോകുലം മൂവീസ് നിർമ്മിക്കുന്ന ചിത്രം ജൂലൈ 2025 ൽ ആരംഭിക്കും. അതിന് ശേഷം ആയിരിക്കും പൃഥ്വിരാജ് ചിത്രത്തിൻ്റെ ജോലികൾ ആരംഭിക്കുക. ഇത് കൂടാതെ മഞ്ഞുമ്മൽ ബോയ്സിന് ശേഷം ചിദംബരം ഒരുക്കുന്ന ചിത്രവും ജിത്തു രചിക്കുമെന്ന് വാർത്തകൾ ഉണ്ട്.

പൃഥ്വിരാജ് സംവിധാനം ചെയ്ത മൂന്നാമത്തെ ചിത്രമായ എമ്പുരാൻ 2025 മാർച്ച് 27 നാണ് റിലീസ് ചെയ്യുക. വിലായത്ത് ബുദ്ധ പൂർത്തിയാക്കുന്ന പൃഥ്വിരാജ്, അതിന് ശേഷം മോഹൻലാൽ നായകനായ തൻ്റെ ഈ സംവിധാന സംരംഭത്തിൻ്റെ പോസ്റ്റ് പ്രൊഡക്ഷൻ ജോലികളും പൂർത്തിയാക്കും.