അഹാന കൃഷ്ണയെ ഞെട്ടിച്ച് പൃഥ്വിരാജ് സുകുമാരൻ; നന്ദി പറഞ്ഞു താരം..!

പ്രശസ്ത മലയാള നടൻ കൃഷ്ണ കുമാറിന്റെ മകൾ ആണ് നടിയായ അഹാന കൃഷ്ണ. ഞാൻ സ്റ്റീവ് ലോപസ് എന്ന രാജീവ് രവി ചിത്രത്തിലൂടെ അരങ്ങേറ്റം കുറിച്ച അഹാന പ്രേക്ഷകർക്കിടയിൽ പ്രശസ്തയായതു ടോവിനോ തോമസിന്റെ നായികയായി അഭിനയിച്ച ലൂക്ക എന്ന ചിത്രത്തിലെ പ്രകടനത്തിലൂടെയാണ്. അതിനൊപ്പം നിവിൻ പോളിക്കൊപ്പം ഞണ്ടുകളുടെ നാട്ടിൽ ഒരിടവേള, ശങ്കർ രാമകൃഷ്ണൻ സംവിധാനം ചെയ്ത പതിനെട്ടാം പടി എന്ന ചിത്രത്തിലും അഹാന അഭിനയിച്ചിരുന്നു. സോഷ്യൽ മീഡിയയിൽ ഏറെ സജീവമായ അഹാനയ്ക്ക് ഈ അടുത്തിടെ കടുത്ത സൈബർ ആക്രമണം നേരിടേണ്ടി വന്നിരുന്നു. ഇപ്പോഴിതാ അതിനെതിരെ മുന്നോട്ടു വന്ന അഹാനയ്ക്ക് പിന്തുണയുമായി എത്തിയിരിക്കുന്നത് മലയാളത്തിലെ യുവ സൂപ്പർ താരമായ പൃഥ്വിരാജ് സുകുമാരനാണ്. വർഷങ്ങൾക്കു മുൻപ് മലയാളത്തിൽ ഏറ്റവും കൂടുതൽ സൈബർ ആക്രമണം നേരിട്ട ഒരു നടനായിരുന്നു പൃഥ്വിരാജ് സുകുമാരൻ. തലസ്ഥാനത്തെ കൊവിഡ് വ്യാപനത്തെക്കുറിച്ച് പറഞ്ഞെത്തിയ പോസ്റ്റിന് ശേഷമായാണ് അഹാനയെ വിമര്‍ശിച്ച് ഒട്ടേറെ പേര് രംഗത്തെത്തിയത്.

അതിനു മറുപടിയുമായി എ ലവ് ലെറ്റര്‍ റ്റു സൈബര്‍ ബുള്ളീസ് എന്ന പേരിൽ അഹാന ഒരു വീഡിയോ ചെയ്യുകയും പേരോ, മുഖമോ വ്യക്തിത്വമോ ഇല്ലാത്ത സൈബര്‍ ഗുണ്ടകള്‍ക്കായി ഈ വീഡിയോ സമര്‍പ്പിക്കുന്നുവെന്ന് പറഞ്ഞു സോഷ്യൽ മീഡിയയിൽ പോസ്റ്റ് ചെയ്യുകയും ചെയ്തു. അഹാനയുടെ ആ വീഡിയോ പങ്കു വെച്ച് കൊണ്ടാണ് പൃഥ്വിരാജ് ഈ താരപുത്രിക്ക് പിന്തുണ അറിയിച്ചത്. അദ്ദേഹത്തിനോട് താന്‍ പോസ്റ്റ് ഷെയര്‍ ചെയ്യാന്‍ പറഞ്ഞിരുന്നില്ലെന്നും, തനിക്കു ഇത് വലിയ സർപ്രൈസ് ആയെന്നും അഹാന പറയുന്നു. പൃഥ്വിരാജ് കൂടാതെ സന്തോഷ് ശിവൻ, പേളി മാണി, അനുപമ പരമേശ്വരന്‍, റിമി ടോമി, ആര്യ, രശ്മി സോമന്‍ തുടങ്ങിയവരും അഹാനയ്ക്ക് പിന്തുണയുമായി എത്തിയിരുന്നു. താൻ പൃഥ്വിരാജ് സുകുമാരന്റെ വലിയ ആരാധിക ആണെന്ന് അഹാന നേരത്തെ തന്നെ പറഞ്ഞിട്ടുണ്ട്.

ഫോട്ടോ കടപ്പാട്: ഇൻസ്റ്റാഗ്രാം