പൃഥ്വിരാജ്- ആസിഫ് അലി ഷാജി കൈലാസ് ചിത്രം കാപ്പ റിലീസ് അപ്‌ഡേറ്റ് പുറത്ത്

മലയാളത്തിന്റെ യുവ സൂപ്പർ താരം പൃഥ്വിരാജ് സുകുമാരൻ, യുവ താരം ആസിഫ് അലി എന്നിവർ വീണ്ടും ഒരുമിച്ചെത്തുന്ന ചിത്രമാണ് കാപ്പ. സിംഹാസനം, കടുവ എന്നീ ചിത്രങ്ങൾക്ക് ശേഷം ഷാജി കൈലാസ്- പൃഥ്വിരാജ് ടീം ഒന്നിക്കുന്നു എന്നതും ഇതിന്റെ ഹൈലൈറ്റാണ്. ഒരു മാസ്സ് ചിത്രമായി ഒരുക്കുന്ന കാപ്പയുടെ ടീസർ, മേക്കിങ് വീഡിയോ, പോസ്റ്ററുകൾ എന്നിവ സോഷ്യൽ മീഡിയയിൽ സൂപ്പർ ഹിറ്റാണ്. ഇപ്പോൾ പോസ്റ്റ് പ്രൊഡക്ഷൻ സ്റ്റേജിലുള്ള ഈ ചിത്രത്തിന്റെ റിലീസ് അപ്‌ഡേറ്റ് പുറത്ത് വന്നിരിക്കുകയാണ്. ക്രിസ്മസ് റിലീസായി ഈ വരുന്ന ഡിസംബർ 22 നാണ് കാപ്പ പ്രേക്ഷകരുടെ മുന്നിലെത്തുക. സരിഗമയും തീയറ്റർ ഓഫ് ഡ്രീംസും ചേർന്ന് ഈ ചിത്രം തിയറ്ററുകളിൽ പ്രദർശനത്തിന് എത്തിക്കും. ജിനു വി ഏബ്രഹാം, ഡോൾവിൻ കുര്യാക്കോസ് ദിലീഷ് നായർ എന്നിവരുടെ പങ്കാളിത്തത്തിൽ ആരംഭിച്ച തിയ്യേറ്റർ ഓഫ് ഡ്രീംസ്, സരിഗമ ഇന്ത്യ പ്രൈവറ്റ് ലിമിറ്റഡ്, ഫെഫ്ക റൈറ്റേഴ്സ് യൂണിയന്റെ സഹകരണത്തിൽ നിർമ്മിക്കുന്ന ഈ ചിത്രത്തിലെ നായികാ വേഷങ്ങൾ ചെയ്യുന്നത് അപർണ ബാലമുരളി, അന്ന ബെൻ എന്നിവരാണ്.

തന്റെ പ്രശസ്ത നോവലായ ശംഖുമുഖിയെ അടിസ്ഥാനപ്പെടുത്തി ജി ആർ ഇന്ദുഗോപനാണ് ഈ ചിത്രത്തിന്റെ തിരക്കഥ രചിച്ചിരിക്കുന്നത്. തിരുവനന്തപുരത്തെ ലോക്കൽ ഗുണ്ടകളുടെ ജീവിതത്തിന്റെ പശ്ചാത്തലത്തിൽ കഥ പറയുന്ന ഈ ചിത്രത്തിൽ ദിലീഷ് പോത്തൻ, ജഗദീഷ്, നന്ദു എന്നിവരും അഭിനയിക്കുന്നുണ്ട്. ജോമോൻ ടി ജോൺ ക്യാമറ ചലിപ്പിച്ച ഈ ചിത്രം എഡിറ്റ് ചെയ്യുന്നത് ഷമീർ മുഹമ്മദാണ്. ഏതായാലും സൂപ്പർ ഹിറ്റായ കടുവക്കു ശേഷം അതേ വർഷം തന്നെ പൃഥ്വിരാജ്- ഷാജി കൈലാസ് എം ഒരിക്കൽ കൂടി വരുമ്പോഴുള്ള പ്രേക്ഷക പ്രതീക്ഷകൾ ഏറെയാണ്.