ത്രസിപ്പിക്കാൻ കാപ്പ ഒരുങ്ങി; സെൻസറിങ് പൂർത്തിയാക്കി പൃഥ്വിരാജ്- ഷാജി കൈലാസ് ടീമിന്റെ ആക്ഷൻ ത്രില്ലർ

യുവസൂപ്പർ താരം പൃഥ്വിരാജ് സുകുമാരനെ നായകനാക്കി ഷാജി കൈലാസ് ഒരുക്കിയ ഏറ്റവും പുതിയ ചിത്രമാണ് കാപ്പ. ഒരു ആക്ഷൻ ത്രില്ലറായി ഒരുക്കിയിരിക്കുന്ന കാപ്പയിൽ ആസിഫ് അലിയും പ്രധാന വേഷം ചെയ്യുന്നുണ്ട്. ഡിസംബർ 22 ന് റിലീസ് ചെയ്യാൻ പോകുന്ന ഈ ചിത്രത്തിൽ അപർണ ബാലമുരളിയും അന്ന ബെന്നുമാണ് നായികാ വേഷങ്ങൾ ചെയ്യുന്നത്. ഇപ്പോഴിതാ ഈ ചിത്രത്തിന്റെ സെൻസറിങ് പൂർത്തിയായിരിക്കുകയാണ്. കഴിഞ്ഞ ദിവസം സെൻസറിംഗ് കഴിഞ്ഞപ്പോൾ യു എ സർട്ടിഫിക്കറ്റ് ആണ് ഈ ചിത്രത്തിന് ലഭിച്ചിരിക്കുന്നത്. രണ്ടേകാൽ മണിക്കൂറിന് മുകളിലാണ് ഇതിന്റെ ദൈർഘ്യമെന്നാണ് അറിയാൻ സാധിക്കുന്നത്. ഇതിനോടകം തന്നെ ഇതിന്റെ ആക്ഷൻ നിറഞ്ഞ ടീസർ, ട്രൈലെർ എന്നിവയും അതുപോലെ ഒരു ഗാനവും സൂപ്പർ ഹിറ്റായിട്ടുണ്ട്. ഇതിലെ ഒരു ഗാനം കൂടി ഉടനെ റിലീസ് ചെയ്യുമെന്നാണ് സൂചന.

സിംഹാസനം, കടുവ എന്നീ ചിത്രങ്ങൾക്ക് ശേഷം ഷാജി കൈലാസ്- പൃഥ്വിരാജ് ടീം ഒന്നിച്ച കാപ്പ രചിച്ചിരിക്കുന്നത്, തന്റെ പ്രശസ്ത നോവലായ ശംഖുമുഖിയെ അടിസ്ഥാനപ്പെടുത്തി ജി ആർ ഇന്ദുഗോപനാണ്. തിരുവനന്തപുരത്തെ ലോക്കൽ ഗുണ്ടകളുടെ ജീവിതത്തിന്റെ പശ്ചാത്തലത്തിൽ കഥ പറയുന്ന കാപ്പയിൽ ദിലീഷ് പോത്തൻ, ജഗദീഷ്, നന്ദു എന്നിവരും നിർണ്ണായക വേഷങ്ങൾ ചെയ്യുന്നുണ്ട്. ജോമോൻ ടി ജോൺ ക്യാമറ ചലിപ്പിച്ച ഈ ചിത്രം എഡിറ്റ് ചെയ്തിരിക്കുന്നത് ഷമീർ മുഹമ്മദാണ്. ഡോൺ വിൻസെന്റ് സംഗീതമൊരുക്കിയ ഈ ചിത്രത്തിൽ കോട്ട മധു എന്ന കഥാപാത്രമായാണ് പൃഥ്വിരാജ് എത്തുന്നത്. പൃഥ്വിരാജ് സുകുമാരന്റെ കിടിലൻ ആക്ഷൻ സീനുകൾ ഈ ചിത്രത്തിന്റെ ഹൈലൈറ്റായി മാറുമെന്നാണ് സൂചന. ജിനു വി ഏബ്രഹാം, ഡോൾവിൻ കുര്യാക്കോസ് ദിലീഷ് നായർ എന്നിവരുടെ പങ്കാളിത്തത്തിൽ ആരംഭിച്ച തിയ്യേറ്റർ ഓഫ് ഡ്രീംസ്, സരിഗമ ഇന്ത്യ പ്രൈവറ്റ് ലിമിറ്റഡ്, ഫെഫ്ക റൈറ്റേഴ്സ് യൂണിയന്റെ സഹകരണത്തിൽ നിർമ്മിക്കുന്ന ചിത്രമാണ് കാപ്പ.