അക്ഷയ് കുമാർ- ടൈഗർ ഷെറോഫ് ചിത്രത്തിൽ വില്ലനായി പൃഥ്വിരാജ് സുകുമാരൻ

മലയാളത്തിന്റെ യുവ സൂപ്പർ താരം പൃഥ്വിരാജ് സുകുമാരൻ ബോളിവുഡിൽ ഒന്നിലധികം ചിത്രങ്ങളുമായി തിരിച്ചെത്താനുള്ള തയ്യാറെടുപ്പിലാണ്. അയ്യാ, ഔരംഗസേബ്‌, നാം ശബാന തുടങ്ങിയ ഹിന്ദി ചിത്രങ്ങളിൽ തിളങ്ങിയിട്ടുള്ള പൃഥ്വിരാജ് സുകുമാരൻ, നവാഗതനായ കായോസ്‌ ഇറാനി സംവിധാനം ചെയ്യാൻ പോകുന്ന ചിത്രത്തിൽ നായകനായി എത്തുന്നു എന്ന് വാർത്തകൾ വന്നിരുന്നു. കജോൾ, സെയ്ഫ് അലി ഖാന്റെ മകൻ ഇബ്രാഹിം അലി ഖാൻ എന്നിവരും അഭിനയിക്കുന്ന ഈ ചിത്രം നിർമ്മിക്കുന്നത് ധർമ്മ പ്രൊഡക്ഷൻസിന്റെ ബാനറിൽ കരൺ ജോഹർ ആണെന്ന വാർത്തകളാണ് വന്നത്. എന്നാൽ ഇപ്പോഴിതാ, ആ ചിത്രത്തിന്റെ ഒഫീഷ്യൽ പ്രഖ്യാപനം വരുന്നതിന് മുൻപ് മറ്റൊരു ബോളിവുഡ് ചിത്രം പ്രഖ്യാപിച്ചിരിക്കുകയാണ് പൃഥ്വിരാജ് സുകുമാരൻ. അക്ഷയ് കുമാർ- ടൈഗർ ഷെറോഫ് എന്നിവർ പ്രധാന വേഷങ്ങൾ ചെയ്യുന്ന ബഡെ മിയാൻ ചോട്ടെ മിയാൻ എന്ന ചിത്രത്തിൽ വില്ലനായാണ് പൃഥ്വിരാജ് അഭിനയിക്കാൻ പോകുന്നത്.

അലി അബ്ബാസ് സഫർ സംവിധാനം ചെയ്യാൻ പോകുന്ന ഈ ചിത്രം നിർമ്മിക്കുന്നത് പൂജ എന്റെർറ്റൈന്മെന്റ്‌സാണ്. അക്ഷയ് കുമാർ, ടൈഗർ ഷെറോഫ്, പൃഥ്വിരാജ് സുകുമാരൻ എന്നിവർ ഒന്നിക്കുന്നതോടെ ഈ ചിത്രത്തിന് മേലുള്ള പ്രതീക്ഷകൾ വർധിച്ചിരിക്കുകയാണ്. അടുത്ത വർഷമായിരിക്കും പൃഥ്വിരാജ് ഈ ചിത്രം ചെയ്യുക എന്നാണ് സൂചന. മോഹൻലാലിനെ നായകനാക്കി പൃഥ്വിരാജ് സംവിധാനം ചെയ്യാൻ പോകുന്ന എംപുരാൻ എന്ന ചിത്രം അടുത്ത വർഷം ആരംഭിക്കാനിരിക്കുകയാണ്. അതിന് മുൻപ് ഈ ബോളിവുഡ് ചിത്രം തീർക്കാനാണ് പൃഥ്വിരാജ് സുകുമാരന്റെ പ്ലാനെന്നാണ് സൂചന. ജയൻ നമ്പ്യാർ ഒരുക്കുന്ന വിലായത്ത് ബുദ്ധയിലാണ് ഇപ്പോൾ പൃഥ്വിരാജ് അഭിനയിക്കുന്നത്. ഇതിനു ശേഷം പ്രശാന്ത് നീൽ ഒരുക്കുന്ന സലാറും പൃഥ്വിരാജ് ചെയ്ത് തീർക്കും. അതിലും നെഗറ്റീവ് വേഷത്തിലാണ് താരം എത്തുന്നത്.