മോഹൻലാൽ ചിത്രം ബറോസിൽ നിന്ന് പൃഥ്വിരാജ് പിന്മാറി; പകരം ആര്..?

കംപ്ലീറ്റ് ആക്ടർ മോഹൻലാൽ ആദ്യമായി സംവിധാനം ചെയ്യുന്ന ചിത്രമാണ് ബറോസ്. മോഹൻലാൽ തന്നെ നായക വേഷവും ചെയ്യുന്ന ഈ ചിത്രത്തിന്റെ ഷൂട്ടിങ് കോവിഡ് പ്രതിസന്ധി മൂലം മുടങ്ങി കിടക്കുകയായിരുന്നു. ഇപ്പോൾ വീണ്ടും ഷൂട്ട് ആരംഭിച്ച ഈ ചിത്രത്തിന്റെ താരനിരയിലും ഏറെ മാറ്റങ്ങൾ വന്നിരിക്കുകയാണ്. ചിത്രത്തിൽ ലീഡ് റോൾ ചെയ്യാനിരുന്ന പെണ്കുട്ടി വളർന്നു പോയത് കൊണ്ട് തന്നെ മറ്റൊരു ചെറിയ കുട്ടിയെ കണ്ടെത്തിയിരിക്കുകയാണ് അണിയറ പ്രവർത്തകർ. മുംബൈ സ്വദേശി മായ എന്ന പെണ്കുട്ടി ആണത്. അതുപോലെ തന്നെ ഈ ചിത്രത്തിൽ ഒരു അതിഥി വേഷം ചെയ്യാനിരുന്ന പൃഥ്വിരാജ് സുകുമാരനും ഇതിൽ നിന്ന് പിന്മാറി. കടുവ എന്ന ചിത്രം തീർക്കാൻ ഉള്ളത് കൊണ്ടും അതിനു ശേഷം ബ്ലസി ഒരുക്കുന്ന ആട് ജീവിതത്തിനു വേണ്ടി ശരീരഭാരം കുറക്കുന്നത് കൊണ്ടുമാണ് പൃഥ്വിരാജ് സുകുമാരൻ ഈ ചിത്രത്തിൽ നിന്നും മാറി നിന്നത്.

പൃഥ്വിരാജ് മാറിയതോടെ പകരം ആ വേഷം ചെയ്യാൻ ഉണ്ണി മുകുന്ദൻ വരും എന്നാണ് സൂചന. അതുപോലെ ഡേറ്റ് ഇഷ്യൂ കാരണം പിന്മാറിയ മറ്റൊരു നടൻ പ്രതാപ് പോത്തൻ ആണ്. മിന്നൽ മുരളി എന്ന ചിത്രത്തിലെ സൂപ്പർ വില്ലൻ ആയി കയ്യടി നേടിയ ഗുരു സോമസുന്ദരം ആണ് ഇനി ആ കഥാപാത്രം ചെയ്യുക. ഒരു ത്രീഡി ഫാന്റസി ചിത്രമായാണ് ബറോസ് ഒരുക്കുന്നത്. വമ്പൻ ബഡ്ജറ്റിൽ ഒരുങ്ങുന്ന ഈ ചിത്രം രചിച്ചിരിക്കുന്നത് ജിജോ പുന്നൂസും നിർമ്മിക്കുന്നത് ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരുമാണ്. സന്തോഷ് ശിവൻ ക്യാമറ ചലിപ്പിക്കുന്ന ഈ ചിത്രത്തിന് സംഗീതം ഒരുക്കുന്നത് ലിഡിയൻ നാദസ്വരവും എഡിറ്റ് ചെയ്യുന്നത് ശ്രീകർ പ്രസാദുമാണ്.