ഇതിഹാസ സിനിമാനുഭവത്തിന് ദിവസങ്ങൾ മാത്രം ബാക്കി; ആട് ജീവിതം ബുക്കിംഗ് ആരംഭിച്ചു

മലയാളത്തിന്റെ യുവ സൂപ്പർ താരം പൃഥ്വിരാജ് സുകുമാരൻ നായകനായ ആട് ജീവിതം റിലീസ് ചെയ്യാൻ ദിവസങ്ങൾ മാത്രം ബാക്കി. ഈ വരുന്ന മാർച്ച് 28 നു ആഗോള റിലീസായി പ്രേക്ഷകരുടെ മുന്നിലെത്തുന്ന ഈ ചിത്രം പൃഥ്വിരാജ് സുകുമാരന്റെ സിനിമാ ജീവിതത്തിലെ ഇതുവരെയുള്ള ഏറ്റവും വലിയ ചിത്രം കൂടിയാണ്. ബെന്യാമിൻ രചിച്ച ഇതേ പേരിലുള്ള പ്രശസ്തമായ നോവൽ ആസ്പദമാക്കി, പ്രശസ്ത സംവിധായകൻ ബ്ലെസി രചിച്ചു സംവിധാനം ചെയ്ത ഈ ചിത്രം വിഷ്വൽ റൊമാൻസ് ഇമേജ് മേക്കർസ്, ജെറ്റ് മീഡിയ പ്രൊഡക്ഷൻസ്, അൾട്ട ഗ്ലോബൽ മീഡിയ എന്നിവയുടെ ബാനറിൽ ബ്ലെസ്സി, ജിമ്മി ജീൻ ലൂയിസ്, സ്റ്റീവൻ ആഡംസ് എന്നിവർ ചേർന്നാണ് നിർമ്മിച്ചിരിക്കുന്നത്. ഇപ്പോഴിതാ, ഈ ചിത്രത്തിന്റെ കേരളത്തിലെ അഡ്വാൻസ് ബുക്കിംഗ് ആരംഭിച്ചിരിക്കുകയാണ്. കേരളത്തിലെ ഏറ്റവും മികച്ച തീയേറ്ററുകളിൽ ഒന്നായ തൃശൂർ രാഗത്തിൽ ഉൾപ്പെടെ ഗംഭീര അഡ്വാൻസ് ബുക്കിങ്ങാണ് ഈ ചിത്രത്തിന് ലഭിക്കുന്നത്. ഇതിന്റെ ആദ്യ ദിവസത്തെ ബഹുഭൂരിപക്ഷം ടിക്കറ്റുകളും രാഗത്തിൽ വിറ്റു പോയിക്കഴിഞ്ഞു.

കേരളത്തിലുടനീളം ഈ ചിത്രത്തിന്റെ ബുക്കിംഗ് ഉടനെ ആരംഭിക്കും. കേരളം കൂടാതെ യു എ ഇ യിലും ഈ ചിത്രത്തിന്റെ അഡ്വാൻസ് ബുക്കിംഗ് ആരംഭിച്ചു കഴിഞ്ഞു. സംഗീത മാന്ത്രികൻ എ ആർ റഹ്മാനാണ് ഈ ചിത്രത്തിന്റെ സംഗീത സംവിധാനം നിർവഹിച്ചത്. ഇതിന്റെ ട്രൈലെർ, ഇതിലെ ഗാനങ്ങൾ എന്നിവക്ക് വലിയ പ്രേക്ഷക പ്രശംസയാണ് ലഭിക്കുന്നത്. പൃഥ്വിരാജ് കൂടാതെ അമല പോൾ, റിക് അബി, താലിബ് മുഹമ്മദ് എന്നിവരും വേഷമിട്ട ഈ ചിത്രത്തിന് ദൃശ്യങ്ങൾ ഒരുക്കിയത് സുനിൽ കെ എസ്, സൗണ്ട് ഡിസൈനിങ് നിർവഹിച്ചത് ഓസ്കാർ അവാർഡ് ജേതാവായ റസൂൽ പൂക്കുട്ടി, എഡിറ്റ് ചെയ്തിരിക്കുന്നത് ശ്രീകർ പ്രസാദ് എന്നിവരാണ്. ഈ ചിത്രത്തിലെ നജീബ് എന്ന കേന്ദ്ര കഥാപാത്രത്തിന് ജീവൻ നൽകാനായി വലിയ രീതിയിലാണ് പൃഥ്വിരാജ് തന്റെ ശരീര ഭാരം കുറച്ചത്.