മോഹൻലാൽ- സത്യൻ അന്തിക്കാട് യൂണിവേഴ്സിൽ പ്രേമലു താരം; ഹൃദയപൂർവം കാസ്റ്റ് അപ്‌ഡേറ്റ്

കംപ്ലീറ്റ് ആക്ടർ മോഹൻലാലിനെ നായകനാക്കി സത്യൻ അന്തിക്കാട് ഒരുക്കാൻ പോകുന്ന ഏറ്റവും പുതിയ ചിത്രമാണ് ഹൃദയപൂർവം. ഒൻപത് വർഷത്തിന് ശേഷം മോഹൻലാൽ- സത്യൻ അന്തിക്കാട് ടീം ഒന്നിക്കുന്ന ഈ ചിത്രം ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് നിർമ്മിക്കുന്നത്. ഡിസംബർ അവസാനത്തോടെയോ ജനുവരിയിലോ ഈ ചിത്രം ആരംഭിക്കുമെന്നാണ് സൂചന.

ഇപ്പോഴിതാ ഈ ചിത്രത്തിന്റെ താരനിരയിലേക് പ്രേമലുവിലൂടെ ശ്രദ്ധ നേടിയ സംഗീത് പ്രതാപും എത്തുന്നു എന്ന അപ്‌ഡേറ്റ് ആണ് പുറത്തു വരുന്നത്. അമൽ ഡേവിസ് എന്ന കഥാപാത്രത്തിലൂടെ പ്രേക്ഷകരുടെ ഇഷ്ടം പിടിച്ചുപറ്റിയ നടനാണ് സംഗീത്. എഡിറ്റർ കൂടിയായ സംഗീത് മോഹൻലാൽ – സത്യൻ അന്തിക്കാട് കൂട്ടുകെട്ടിൽ ഒരുങ്ങുന്ന പുതിയ ചിത്രത്തിൽ അഭിനയിക്കുന്നു എന്ന് വെളിപ്പെടുത്തിയത് സത്യൻ അന്തിക്കാടിന്റെ മകനും സംവിധായകനുമായ അഖിൽ സത്യനാണ്.

‘മോഹൻലാൽ – സത്യൻ അന്തിക്കാട് യൂണിവേഴ്‌സി അമൽ ഡേവിസും’ എന്ന അടിക്കുറിപ്പോടെ സത്യൻ അന്തിക്കാടും സംഗീത് പ്രതാപും ഒരുമിച്ചുള്ള ചിത്രവും അഖിൽ പങ്കു വെച്ചു. ഐശ്വര്യ ലക്ഷ്മിയും ശ്രീനിവാസൻ ചിത്രം ചിന്താവിഷ്ടയായ ശ്യാമളയിലൂടെ മലയാളികളുടെ പ്രിയങ്കരിയായ സംഗീതയും ആണ് ചിത്രത്തിലെ നായികമാർ.

നവാഗതനായ സോനു ടി പിയാണ് ഈ ചിത്രത്തിന്റെ രചന നിർവഹിക്കുന്നത്. സൂഫിയും സുജാതയും എന്ന ചിത്രത്തിലൂടെ ശ്രദ്ധ നേടിയ അനു മൂത്തേടത്ത് കാമറ ചലിപ്പിക്കുന്ന ഈ ചിത്രത്തിന്റെ കലാസംവിധാനം നിർവഹിക്കുന്നത് ആട് ജീവിതത്തിലൂടെ കയ്യടി നേടിയ പ്രശാന്ത് മാധവ് ആണ്. തമിഴിലെ സൂപ്പർഹിറ്റ് സംഗീത സംവിധായകൻ ജസ്റ്റിൻ പ്രഭാകറാണ് ഹൃദയപൂർവത്തിന് വേണ്ടി സംഗീത സംവിധാനം നിർവഹിക്കുന്നത്.