പൂമരം ഇന്ന് മുതൽ പ്രേക്ഷകരിലേക്ക്; തിയേറ്റർ ലിസ്റ്റ് എത്തി..!

മലയാള സിനിമാ പ്രേക്ഷകർ ഏറെ ആവേശത്തോടെയും ആകാംഷയോടെയും കാത്തിരിക്കുന്ന കാളിദാസ് ജയറാം ചിത്രം പൂമരം ഇന്ന് മുതൽ കേരളത്തിലെ പ്രദർശനശാലകളിൽ എത്തുകയാണ് . കാളിദാസ് ജയറാം നായകനായി അരങ്ങേറുന്ന ചിത്രമെന്ന നിലയിലും അതുപോലെ റിലീസ് ഒരുപാട് നീണ്ടു പോയി വാർത്തകളിലും ട്രോളുകളിലും ഇടം നേടിയ ചിത്രം എന്ന നിലയിലും പൂമരം ഏറെ പ്രതീക്ഷകളോടെയാണ് സിനിമാ പ്രേമികൾ കാത്തിരിക്കുന്നത്. ഇപ്പോഴിതാ ഈ ചിത്രത്തിന്റെ തിയേറ്റർ ലിസ്റ്റ് എത്തി കഴിഞ്ഞു. കേരളത്തിലെ നൂറോളം സ്‌ക്രീനുകളിൽ പ്രദർശനത്തിന് എത്തുന്ന ഈ ചിത്രം സംവിധാനം ചെയ്തിരിക്കുന്നത് പ്രശസ്ത സംവിധായകൻ ആയ എബ്രിഡ് ഷൈൻ ആണ്. ഡോക്ടർ പോൾ ആണ് ഈ ചിത്രം നിർമ്മിച്ചിരിക്കുന്നത്. ക്യാമ്പസ് പശ്ചാത്തലത്തിൽ ഒരുക്കിയ ഈ ചിത്രത്തിൽ കാളിദാസ് ജയറാമിന് ഒപ്പം ഒട്ടേറെ പുതുമുഖങ്ങൾ വേഷമിട്ടിട്ടുണ്ട്.

വലിയ കാത്തിരിപ്പിനു ശേഷം ഒട്ടേറെ പ്രതിസന്ധികൾ തരണം ചെയ്തു തിയേറ്ററിൽ എത്തുന്ന ഈ ചിത്രം ഒരു വലിയ വിജയം ആവുമെന്നാണ് പ്രേക്ഷകരുടെയും അണിയറ പ്രവർത്തകരുടെയും പ്രതീക്ഷ. ഈ ചിത്രത്തിലെ രണ്ടു ഗാനങ്ങൾ ഒരുപാട് നാളുകൾക്കു മുൻപേ തന്നെ കേരളത്തിൽ തരംഗമായി മാറിയിരുന്നു. ബിൻസൺ തോമസ്, ജോജു ജോർജ് എന്നിവരും പ്രധാന വേഷങ്ങളിൽ എത്തിയിരിക്കുന്ന ഈ ചിത്രത്തിന് സംഗീതം ഒരുക്കിയിരിക്കുന്നത് ഫൈസൽ റാസി, ഗിരീഷ് കുട്ടൻ എന്നിവരും ദൃശ്യങ്ങൾ നൽകിയത് എസ് ജ്ഞാനം എന്ന ഛായാഗ്രാഹകനുമാണ്. ജിത് ജോഷി ആണ് ഈ ചിത്രം എഡിറ്റ് ചെയ്തിരിക്കുന്നത്. ലൈം ലൈറ്റ് സിനിമാസ്, ഡോക്ടർ പോൾ എന്റെർറ്റൈന്മെന്റ്സ് എന്നിവയുടെ ബാനറിൽ നിർമ്മിച്ചിരിക്കുന്ന ഈ ചിത്രത്തിന് രചന നിർവഹിച്ചിരിക്കുന്നത് എബ്രിഡ് ഷൈൻ തന്നെയാണ്.