17 വയസ്സുകാരിക്കെതിരെയുള്ള പീഡന ശ്രമം മറച്ചു വെച്ചു; നടി രേവതിക്കെതിരെ കേസെടുക്കണമെന്ന് പരാതി..!

ഇന്നലെയാണ് വുമൺ ഇൻ സിനിമ കളക്ടീവ് എന്ന മലയാള സിനിമയിലെ വനിതാ സംഘടനാ , മലയാള സിനിമാ നടീനടമാരുടെ സംഘടനയായ അമ്മക്കെതിരെ ആഞ്ഞടിച്ചു കൊണ്ട് പത്ര സമ്മേളനം നടത്തിയത്. ‘അമ്മ നേതൃത്വത്തിന് എതിരെയും ദിലീപ് വിഷയത്തിൽ അവർ എടുത്ത നടപടികളിലും കടുത്ത അതൃപ്ത്തി രേഖപ്പെടുത്തിയ അവർ, ഇനി അമ്മയുമായി തുറന്ന യുദ്ധത്തിന് തന്നെയാണ് തങ്ങളുടെ തീരുമാനം എന്നറിയിച്ചു. പദ്മപ്രിയ, പാർവതി, രേവതി, അഞ്ജലി മേനോൻ, റിമ കല്ലിങ്ങൽ, ബീന പോൾ, ദീദി ദാമോദരൻ തുടങ്ങി അവരുടെ സംഘടനയിലെ പ്രമുഖരെല്ലാം വാർത്താ സമ്മേളനത്തിൽ പങ്കെടുത്തിരുന്നു. അവിടെ വെച്ചു നടി രേവതി പറഞ്ഞ ഒരു കാര്യം ഇപ്പോൾ അവർക്കു തന്നെ പുലിവാലായി വന്നിരിക്കുകയാണ്. വർഷങ്ങൾക്കു മുൻപ് ഒരു സിനിമാ ചിത്രീകരണം നടക്കുമ്പോൾ പതിനേഴു വയസ്സുള്ള ഒരു പെൺകുട്ടി തന്നെ രക്ഷിക്കണം എന്ന് പറഞ്ഞു കൊണ്ട് തന്റെ മുറിയിൽ വന്നെന്നും ഒരു പീഡന ശ്രമത്തിൽ നിന്നുമാണ് ആ കുട്ടി രക്ഷപെട്ടു എത്തിയതുമെന്നുമുള്ള രീതിയിൽ രേവതി സംസാരിച്ചു.

എന്നാൽ അങ്ങനെ ഒരു സംഭവം അറിഞ്ഞിട്ടും ആ പീഡന ശ്രമം മറച്ചു വെച്ചു കൊണ്ട് ഇത്രയും നാളും മിണ്ടാതിരുന്ന രേവതിക്കെതിരെ കേസ് എടുക്കണമെന്ന് ഇപ്പോൾ പോലീസിൽ പരാതി ചെന്നിരിക്കുകയാണ്. എറണാകുളം സെൻട്രൽ പോലീസിന് മുന്നിൽ ആണ് ഈ പരാതി ചെന്നിരിക്കുന്നതു. അഭിഭാഷകനായ ജിയാസ് ജമാൽ ആണ് രേവതിക്കെതിരെ കേസ് വേണം എന്ന് ആവശ്യപ്പെട്ടിരിക്കുന്നത്. പീഡന ശ്രമം അറിഞ്ഞിട്ടും അത് പറയാതെ മറച്ചു വെക്കുന്നതും നമ്മുടെ നിയമ പ്രകാരം കുറ്റകരമായ വസ്തുതയാണ്. ‘അമ്മ പ്രസിഡന്റ് മോഹൻലാൽ തന്നേയും പദ്മപ്രിയയേയും പാർവതിയെയും നടിമാർ എന്ന് വിളിച്ചു ആക്ഷേപിച്ചു എന്ന് രേവതി പറഞ്ഞതും വിവാദമായി. സോഷ്യൽ മീഡിയ മുഴുവൻ ഇക്കാര്യത്തിൽ മോഹൻലാലിന് ഒപ്പം നിന്ന് കൊണ്ട് രേവതിയെ ട്രോള് ചെയ്യുകയാണ് ഇപ്പോൾ. നടിമാർ എന്ന വാക്ക് ഉപയോഗിച്ചതിൽ എന്താണ് തെറ്റ് എന്നാണ് എല്ലാവരും ചോദിക്കുന്നത്.