കുട്ടികളും ഏറ്റെടുക്കുന്നു ഈ പോക്കിരി സൈമണിനെ..!

ഒരു ചിത്രം എന്നും വലിയ വിജയത്തിലേക്ക് നീങ്ങുന്നത് ആ ചിത്രം കുടുംബ പ്രേക്ഷകർ ഇരു കയ്യും നീട്ടി സ്വീകരിക്കുമ്പോൾ ആണ്. സ്ത്രീകളും കുട്ടികളും ഒരു ചിത്രത്തെ ഏറ്റെടുത്താൽ പിന്നെ ആ ചിത്രത്തിന് ബോക്സ് ഓഫീസിൽ തിരിഞ്ഞു നോക്കേണ്ട കാര്യമില്ല . സണ്ണി വെയ്ൻ നായകനായ പുതിയ ചിത്രമായ പോക്കിരി സൈമൺ ഇപ്പോൾ കുട്ടികളും കുടുംബങ്ങളും ഏറ്റെടുക്കുകയാണ് എന്നാണ് തിയേറ്റർ റിപ്പോർട്ടുകൾ സൂചിപ്പിക്കുന്നത്. കേരളമെങ്ങും ഹൌസ് ഫുൾ ഷോകളും ആയി മുന്നേറുന്ന ഈ ചിത്രം യുവാക്കൾ ആദ്യമേ തന്നെ ഇരു കയ്യും നീട്ടി സ്വീകരിച്ചു കഴിഞ്ഞിരുന്നു.

പ്രത്യേകിച്ച് കേരളത്തിലെ വിജയ് ആരാധകർ ഈ ചിത്രം ഹൃദയം കൊണ്ടാണ് സ്വീകരിച്ചത് എന്ന് പറയാം. കടുത്ത വിജയ് ആരാധകനായ സൈമൺ എന്ന യുവാവിന്റെ കഥ പറയുന്ന ഈ ചിത്രം വിജയ് എന്ന നടന്റെയും വിജയ്‌യുടെ ചിത്രങ്ങളുടെയും ഒരു ആഘോഷം തന്നെയാണ് സമ്മാനിക്കുന്നത്.

ജിജോ ആന്റണി സംവിധാനം ചെയ്ത മൂന്നാമത്തെ ചിത്രമായ പോക്കിരി സൈമൺ നിർമ്മിച്ചിരിക്കുന്നത് കൃഷ്ണൻ സേതു കുമാർ ആണ്. ശ്രീവരി ഫിലിമ്സിന്റെ ബാനറിൽ ആണ് അദ്ദേഹം ഈ ചിത്രം നിർമ്മിച്ചത്. അഞ്ചു കോടി രൂപ മുതൽ മുടക്കിൽ നിർമ്മിച്ച ഈ ബിഗ് ബജറ്റ് മാസ്സ് എന്റെർറ്റൈനെറിൽ ശരത് കുമാർ, ജേക്കബ് ഗ്രോഗോറി, നെടുമുടി വേണു , സൈജു കുറുപ്പ് എന്നിവരും വിജയ് ആരാധകർ ആയി എത്തിയിരിക്കുന്നു.

പ്രയാഗ മാർട്ടിൻ നായികയായ ഈ ചിത്രത്തിൽ ദിലീഷ് പോത്തൻ, ഷമ്മി തിലകൻ, അശോകൻ എന്നിവരും അഭിനയിച്ചിരിക്കുന്നു. ഗോപി സുന്ദർ ഈണം നൽകിയ അടിപൊളി ഗാനങ്ങളും അതുപോലെ കിടിലൻ സംഘട്ടന രംഗങ്ങളും ഈ ചിത്രത്തിന്റെ പ്രത്യേകതയാണ്. കെ അമ്പാടി ആണ് ഈ ചിത്രം രചിച്ചിരിക്കുന്നത്.

വിമർശന ശരങ്ങളെ കാറ്റിൽ പറത്തിയാണ് പോക്കിരി സൈമൺ ഇപ്പോൾ ബോക്സ് ഓഫീസിൽ തകർക്കുന്നത്. പ്രശസ്ത സംവിധായകൻ ഒമർ ലുലു ഉൾപ്പെടെ പോക്കിരി സൈമൺ എന്ന ചിത്രത്തെ പ്രശംസിച്ചു മുൻപോട്ടു വന്നിരുന്നു.