മോഹൻലാൽ- സിബി മലയിൽ കൂട്ടുകെട്ട് വീണ്ടും വരുന്നത് ആ ക്ലാസിക് ചിത്രത്തിന്റെ രണ്ടാം ഭാഗത്തിലൂടെ?; മനസ്സ് തുറന്നു സിബി മലയിൽ..!

മലയാളത്തിലെ ഏറ്റവും മികച്ച നായക – സംവിധായക ജോഡികളിൽ ഒന്നാണ് മോഹൻലാൽ- സിബി മലയിൽ കൂട്ടുകെട്ട്. രചയിതാവായ ലോഹിതദാസിന് ഒപ്പവും അല്ലാതെയും ഇരുവരും ചേർന്ന് സമ്മാനിച്ചത് മലയാളത്തിലെ എക്കാലത്തേയും ക്ലാസിക് ചിത്രങ്ങൾ. മോഹൻലാൽ എന്ന നടൻ രണ്ടു ദേശീയ അംഗീകാരങ്ങൾ നേടിയെടുത്തത് സിബി മലയിൽ ചിത്രങ്ങളിലൂടെയാണ്. ഇവരുടെ കരിയറിലെ ക്ലാസിക് ചിത്രങ്ങളിൽ ഒന്നാണ് 1989 ഇൽ റിലീസ് ചെയ്ത ദശരഥം. ലോഹിതദാസ് രചിച്ച ഈ ചിത്രം മോഹൻലാൽ എന്ന നടന്റെ വിസ്മയിപ്പിക്കുന്ന പ്രകടനം പ്രേക്ഷകരുടെ മുന്നിലെത്തിച്ച ഒരു ചലച്ചിത്രമാണ്. ഇതിലെ രാജീവ് മേനോൻ എന്ന കഥാപാത്രമായി മോഹൻലാൽ നടത്തിയ പ്രകടനത്തിന് പകരം വെക്കാൻ ഇന്നും ഇന്ത്യൻ സിനിമയിൽ മറ്റൊരു പ്രകടനമില്ല. ഇപ്പോഴിതാ വർഷങ്ങൾക്കു ശേഷം മോഹൻലാലുമായി ഒന്നിക്കുമോ എന്ന ചോദ്യത്തിന്, മനോരമക്ക് നൽകിയ അഭിമുഖത്തിൽ സിബി മലയിൽ മനസ്സ് തുറക്കുകയാണ്. ദശരഥ ത്തിലെ രാജീവ് മേനോന്റെ വർത്തമാനകാല ജീവിത വഴികളിലൂടെയുള്ള ഒരന്വേഷണം തന്റെ വലിയ ആഗ്രഹമാണ് എന്നും ആ വഴിയിലൊരു ശ്രമം പൂർണ തിരക്കഥയുമായി താൻ നാലു വർഷം മുൻപ് നടത്തിയിരുന്നു എന്നും സിബി മലയിൽ പറയുന്നു.

മോഹൻലാലിന്റെ തന്നെ വാക്കുകൾ തന്നെ കടമെടുത്തു സിബി മലയിൽ പറയുന്നത്, നല്ലതൊക്കെയും സ്വയം സംഭവിക്കയാണ്‌ ചെയ്യുക. ഇതും നല്ലതാണെങ്കിൽ സംഭവിക്കുക തന്നെ ചെയ്യും എന്ന് ആഗ്രഹിക്കാനും വിശ്വസിക്കാനുമാണ് തനിക്കിഷ്ടമെന്നാണ്. മോഹൻലാൽ എന്ന സൂപ്പർ താരത്തിന്റെ വിപണന മൂല്യത്തേക്കാൾ തന്നെ മോഹിപ്പിക്കുന്നത്‌ മോഹൻലാൽ എന്ന സൂപ്പർ ബ്രില്യന്റ് ആക്ടറുടെ അപാര സാധ്യതകൾ തന്നെയാണ് എന്നും അപൂർവങ്ങളിൽ അപൂർവമായി സംഭവിക്കുന്ന ഒരു പ്രതിഭാസമാണ് മോഹൻലാൽ എന്നും സിബി മലയിൽ പറയുന്നു. ദൂരെ ദൂരെ ഒരു കൂടു കൂട്ടാം, കിരീടം, ഹിസ് ഹൈനെസ്സ് അബ്ദുള്ള, കമലദളം, സദയം, ചെങ്കോൽ, ധനം, ഭരതം, മായാമയൂരം, ഉസ്താദ്, സമ്മർ ഇൻ ബേത്ലഹേം, ദേവദൂതൻ, ഫ്ലാഷ് എന്നിവയാണ് മോഹൻലാൽ- സിബി മലയിൽ കൂട്ടുകെട്ട് ഒന്നിച്ച മറ്റു ചിത്രങ്ങൾ. ഇവയിൽ തൊണ്ണൂറു ശതമാനവും സൂപ്പർ ഹിറ്റുകളായിരുന്നു.