മലയാള സിനിമ കണ്ട ഏറ്റവും മികച്ച നടി പാർവതി എന്ന് സിദ്ദിഖ്; ഉയരെ മുന്നേറുന്നു..!

നവാഗതനായ മനു അശോകൻ സംവിധാനം ചെയ്ത ഉയരെ എന്ന ചിത്രം ഗംഭീര വിജയം നേടി മുന്നേറുകയാണ്. പ്രേക്ഷകരും നിരൂപകരും ഒരേ സ്വരത്തിൽ മികച്ച അഭിപ്രായം പറയുന്ന ഈ ചിത്രത്തിൽ പാർവതി ആണ് കേന്ദ്ര കഥാപാത്രമായ പല്ലവിക്ക് ജീവൻ നൽകിയിരിക്കുന്നത്. ബോബി- സഞ്ജയ് ടീം തിരക്കഥ രചിച്ച ഈ ചിത്രത്തിൽ ആസിഫ് അലി, ടോവിനോ തോമസ്, സിദ്ദിഖ്, പ്രേം പ്രകാശ്, പ്രതാപ് പോത്തൻ, അനാർക്കലി മരക്കാർ എന്നിവരും അഭിനയിച്ചിരിക്കുന്നു. ആസിഡ് ആക്രമണത്തിന് വിധേയയായ പെൺകുട്ടിയായി അവിസ്മരണീയ പ്രകടനമാണ് പാർവതി ഈ ചിത്രത്തിൽ കാഴ്ച വെച്ചിരിക്കുന്നത്. പാർവതിയുടെ കരിയർ ബെസ്റ്റ് എന്ന് വിശേഷിപ്പിക്കാവുന്ന ഈ പ്രകടനത്തിന് പ്രശംസയുമായി ഒട്ടേറെ പേര് രംഗത്ത് വന്നിരുന്നു. ഇപ്പോഴിതാ ഈ ചിത്രത്തിൽ പാർവതിയുടെ അച്ഛൻ വേഷം ചെയ്ത നടൻ സിദ്ദിഖ് ആണ് പാർവതിക്ക് പ്രശംസയുമായി എത്തിയിരിക്കുന്നത്.

ഉയരെയിലെ പല്ലവി എന്ന കഥാപാത്രത്തിനായി പാര്‍വതി നടത്തിയ അര്‍പ്പണമനോഭാവം കണ്ട് ഞെട്ടിപ്പോയെന്നാണ് സിദ്ദിഖ് പറയുന്നത്. പാര്‍വതിയുടെ അര്‍പ്പണ മനോഭാവത്തെ എത്ര പ്രശംസിച്ചാലും മതിയാകില്ലെന്നും പാര്‍വതിയുടെ പ്രായം വെച്ച് നോക്കുമ്പോൾ  ആ ഡെഡിക്കേഷന്‍ എത്രയോ വലുതാണെന്നും സിദ്ദിഖ് പറയുന്നു. മലയാളം കണ്ട ഏറ്റവും മികച്ച നടിമാരുടെ കൂട്ടത്തിൽ ആണ് പാർവതിക്ക് സ്ഥാനം എന്നും സിദ്ദിഖ് അഭിപ്രായപ്പെടുന്നു. പി വി ഗംഗാധരന്റെ മക്കൾ ആയ  ഷെനുഗ, ഷെഗ്‌ന, ഷെര്‍ഗ എന്നിവർ ചേർന്ന് രൂപം നൽകിയ എസ് ക്യൂബ് ഫിലിമ്സിന്റെ ബാനറിൽ ആണ് ഈ ചിത്രം നിർമിച്ചിരിക്കുന്നത്. ആരോഗ്യ മന്ത്രി ശൈലജ ടീച്ചർ അടക്കം ഈ ചിത്രത്തിന് പ്രശംസയുമായി എത്തിയിരുന്നു.