അമ്മ സംഘടനക്കെതിരെ വീണ്ടും പാർവതി; തന്നെ ബാത്റൂം പാർവതിയാക്കി എന്ന് താരം

താര സംഘടനയായ അമ്മക്കെതിരെ നിരന്തര ആരോപണവുമായി രംഗത്ത് വരുന്നവരിൽ പ്രധാനിയാണ് സിനിമയിലെ വനിതാ സംഘടനയുടെ പ്രധാന വക്താവും പ്രശസ്ത നടിയുമായ പാർവതി തിരുവോത്. ദിലീപ് വിഷയത്തിലും മറ്റു പല കാര്യങ്ങളിലും അമ്മയുടെ നിലപാടുകളുമായി യോജിക്കാതെയും മറ്റും പരസ്യമായി പാർവതി നടത്തിയ പല പരാമർശങ്ങളും വലിയ വിവാദങ്ങൾക്കു വഴി വെച്ചിട്ടുണ്ട്. മലയാളത്തിന്റെ മഹാനടൻ മോഹൻലാൽ അമ്മയുടെ പ്രസിഡന്റ് ആയതിനു ശേഷം ഇവരെല്ലാമായി ചർച്ചകൾ വെക്കുകയും കാര്യങ്ങൾ രമ്യതയിലാക്കി മുന്നോട്ടു കൊണ്ട് പോകാൻ മുൻകൈയെടുക്കുകയും ചെയ്തിരുന്നു എങ്കിലും വനിതാ സംഘടനാ പല വിഷയത്തിലും അമ്മയുമായി പോരിൽ തന്നെയാണ്. ഇപ്പോഴിതാ പാർവതിയുടെ പുതിയ തുറന്നു പറച്ചിലും അമ്മ സംഘടനക്ക് എതിരാണ് എന്ന് മാത്രമല്ല താൻ ഇനിയും ഇത്തരം കാര്യങ്ങളിൽ ശബ്ദമുയർത്തുമെന്ന നിലപാടിലാണ് പാർവതി. 2014ൽ അമ്മയുടെ മീറ്റിംഗിൽ സിനിമാ സെറ്റുകളിലെ സാനിട്ടേഷനെ കുറിച്ച് സംസാരിച്ചതിന്റെ പേരിൽ എല്ലാവരുംകൂടി തന്നെ ബാത്ത് റൂം പാർവതിയാക്കിയെന്നാണ് ഈ നടി പറയുന്നത്.

അത്തരത്തിലൊരു ഇരട്ടപ്പേര് തനിക്ക് വീണത് സത്യങ്ങൾ തുറഞ്ഞു പറഞ്ഞത് കൊണ്ടാണെന്നും പാർവതി സൂചിപ്പിക്കുന്നു. കേരള കൗമുദി ഫ്ളാഷ് മൂവീസിൽ പ്രസിദ്ധീകരിച്ച അഭിമുഖത്തിലാണ് പാർവതി ഈ കാര്യങ്ങൾ വെളിപ്പെടുത്തുന്നത്. അഭിമുഖത്തിൽ പാർവതി പറയുന്ന വാക്കുകൾ ഇപ്രകാരം, “കാലാകാലങ്ങളായി ചില ശീലങ്ങൾ നമ്മൾ കണ്ടില്ലെന്ന് നടിക്കും. ഉദാഹരണത്തിന് സെറ്റിലെ ലഹരി ഉപയോഗം പോലുള്ള കാര്യങ്ങൾ. ഇത്രയും വരുമാനമുണ്ടാക്കുന്ന ഒരു ഇൻഡസ്‌ട്രിയിൽ ഇതെല്ലാം നിയമം മൂലം തടയേണ്ടതാണ്. അതുപോലെ സാനിട്ടേഷൻ പ്രശ്‌നങ്ങൾ. 2014ൽ ഇതേക്കുറിച്ച് എ.എം.എം.എയുടെ മീറ്റിംഗിൽ സംസാരിച്ചപ്പോൾ എനിക്ക് ബാത്‌റൂം പാർവതി എന്ന ഇരട്ടപ്പേര് വീണു. ഞാനത് ശ്രദ്ധിച്ചില്ല. പക്ഷേ ഇപ്പോൾ ഒരു സെറ്റിൽ ഒരു വാനിറ്റി വാനെങ്കിലും വന്നിട്ടുണ്ട്. ഇത്തരം ചർച്ചകൾക്ക് വഴി തുറക്കുകയാണ് ഡബ്ല്യു.സി.സി ചെയ്യുന്നത്. ഇനിയും എ.എം.എം.എയുടെ ജനറൽ ബോഡിയിൽ പോയി സംസാരിക്കും. പിന്നാലെ വരുന്ന കുട്ടികൾക്ക് ഇതിന് വേണ്ടി പോരാടേണ്ടി വരരുത്.”