പരോള്‍ വെറും പാര്‍ട്ടി സിനിമ അല്ല, സംപൂര്‍ണ്ണ കുടുംബ ചിത്രം..

മമ്മൂട്ടി ആരാധകരും സിനിമാ പ്രേമികളും ഏറെ പ്രതീക്ഷയോടെ കാത്തിരിക്കുന്ന ചിത്രമാണ് നവാഗതനായ ശരത് സന്ദിത് സംവിധാനം ചെയ്ത പരോൾ എന്ന് പറയാം. ഈ മാസം മുപ്പതിന് റിലീസ് ചെയ്യുന്ന ഈ ചിത്രത്തിന്റെ ട്രൈലെർ ദിവസങ്ങൾക്കു മുന്നേ പുറത്തിറങ്ങുകയും മികച്ച പ്രതികരണം നേടിയെടുക്കുകയും ചെയ്തിരുന്നു. സഖാവ് അലക്സ് എന്ന കഥാപാത്രത്തെയാണ് ഈ ചിത്രത്തിൽ മമ്മൂട്ടി അവതരിപ്പിക്കുന്നത്. ഏറെ ശ്രദ്ധ നേടിയ ഈ ചിത്രത്തിന്റെ പോസ്റ്ററുകളും ഡിജിറ്റൽ ഫ്ലിപ്പും ഇപ്പോൾ ട്രെയ്‌ലറും സൂചിപ്പിക്കുന്ന കാര്യം എന്തെന്നാൽ , പരോൾ എന്ന ഈ ചിത്രം കുടുംബ പ്രേക്ഷകർക്കും ആരാധകർക്കും ഒരേ പോലെ സ്വീകാര്യമാകുന്ന തരത്തിലുള്ള ഒരു ചിത്രമാണെന്നാണ്.

വൈകാരിക മുഹൂർത്തങ്ങളും കുടുംബ ബന്ധങ്ങളുടെ ആഴവും ആവിഷ്ക്കരിക്കുന്നതിനൊപ്പം തന്നെ ശ്കതമായ രീതിയിൽ രാഷ്ട്രീയവും അതുപോലെ മാസ്സ് രംഗങ്ങളും ഈ ചിത്രത്തിൽ ഉണ്ടാകും എന്നാണ് ട്രൈലെർ സൂചിപ്പിക്കുന്നത്. മികച്ച ഡയലോഗുകളും ഈ ചിത്രത്തിൽ ആരാധകരെ ആവേശം കൊള്ളിക്കാനായി ഉണ്ടാകും എന്നാണ് സൂചന. സെഞ്ച്വറി ഫിലിംസാണ് ഈ ചിത്രം കേരളത്തിൽ വിതരണം ചെയ്യുന്നത്. സഖാവ് അലക്സ് എന്ന കഥാപാത്രത്തിന്റെ ജീവിതത്തിലെ നിർണ്ണായകമായ മൂന്നു കാലഘട്ടത്തിലൂടെയാണ് ഈ ചിത്രം വികസിക്കുന്നത് എന്നാണ് റിപ്പോർട്ടുകൾ പറയുന്നത്.

മമ്മൂട്ടിയോടൊപ്പം മിയ, ഇനിയ, സിദ്ദിഖ് , സുരാജ് വെഞ്ഞാറമ്മൂട്, കാലകേയ പ്രഭാകർ തുടങ്ങി ഒരു വമ്പൻ താര നിര തന്നെ ഈ ചിത്രത്തിൽ അണിനിരക്കുന്നുണ്ട്. ആന്റണി ഡിക്രൂസ് നിർമ്മിച്ച ഈ ചിത്രത്തിന്റെ തിരക്കഥ രചിച്ചിരിക്കുന്നത് അജിത് പൂജപ്പുര ആണ്. പ്രശസ്ത ഛായാഗ്രാഹകൻ എസ് ലോകനാഥൻ ദൃശ്യങ്ങൾ ഒരുക്കിയ ഈ ചിത്രം എഡിറ്റ് ചെയ്തത് സുരേഷും അതുപോലെ സംഗീതം പകർന്നിരിക്കുന്നത് ശരത്, എൽവിൻ ജോഷുവ എന്നിവരുമാണ്. ഈ വർഷത്തെ മെഗാ സ്റ്റാർ മമ്മൂട്ടിയുടെ രണ്ടാമത്തെ റിലീസ് ആയിരിക്കും പരോൾ എന്ന ചിത്രം.