വമ്പൻ തുക റീമേക് അവകാശമായി നേടി ദൃശ്യം 2 ഇനി ബോളിവുഡിലേക്കും..!

ഈ വർഷം റിലീസ് ചെയ്ത ഏക മോഹൻലാൽ ചിത്രമായിരുന്നു ജീത്തു ജോസഫ് സംവിധാനം ചെയ്ത ദൃശ്യം 2. പ്രേക്ഷകരും നിരൂപകരും ഒരുപോലെ പ്രശംസ ചൊരിഞ്ഞ ഈ ചിത്രം നേടിയ ആഗോള വിജയം അത്ര വലുതായിരുന്നു. കേരളത്തിന് പുറത്തും ഇന്ത്യക്കു പുറത്തും ഇത്രയും പ്രേക്ഷക സ്വീകാര്യത ലഭിച്ച മറ്റൊരു മലയാള ചിത്രവുമില്ല എന്ന് തന്നെ പറയാം. ഇതിലെ ഗംഭീര പ്രകടനത്തിന് മോഹൻലാലിനും ഈ ചിത്രം രചിച്ചു സംവിധാനം ചെയ്ത ജീത്തു ജോസഫിനും ലഭിച്ചത് ആഗോള തലത്തിൽ നിന്നുവരെയുള്ള കയ്യടിയും അഭിനന്ദനവുമാണ്. ഒരു മലയാള സിനിമ നേടുന്ന ഏറ്റവും വലിയ ഡിജിറ്റൽ അവകാശ തുകയായ 30 കോടി രൂപ നൽകിയാണ് ആമസോൺ പ്രൈം ഈ ചിത്രം വാങ്ങിച്ചത്. ഇപ്പോഴിതാ മലയാള സിനിമയുടെ ചരിത്രത്തിലെ തന്നെ മറ്റൊരു വമ്പൻ തുകക്ക് ഈ ചിത്രത്തിന്റെ ഹിന്ദി റീമേക് അവകാശവും വിറ്റു പോയിരിക്കുകയാണ്. പനോരമ സ്റ്റുഡിയോസ് ഇന്റര്‍നാഷനലിന്റെ ബാനറിൽ കുമാര്‍ മംഗത് പതക് ആണ് ഈ ചിത്രത്തിന്റെ ഹിന്ദി പതിപ്പ് നിർമ്മിക്കുക.

ഇപ്പോൾ ഈ ചിത്രത്തിന്റെ തെലുങ്കു പതിപ്പിന്റെ ഷൂട്ടിംഗ് പൂർത്തിയായി കഴിഞ്ഞു. ജീത്തു ജോസഫ് തന്നെ സംവിധാനം ചെയ്ത തെലുങ്കു പതിപ്പിൽ വെങ്കിടേഷ് ആണ് നായകൻ. മലയാളത്തിൽ ഈ ചിത്രം നിർമ്മിച്ച ആന്റണി പെരുമ്പാവൂർ തെലുങ്ക് പതിപ്പിന്റെ കൂടി നിർമ്മാതാവാണ്. ഇത് കൂടാതെ കന്നഡ, തമിഴ് റീമേക്കുകളും ഈ ചിത്രത്തിന് ഉണ്ടാകുമെന്നുള്ള റിപ്പോർട്ടുകളും വരുന്നുണ്ട്. ഇതിന്റെ ആദ്യ ഭാഗമായ ദൃശ്യം ഏറ്റവും കൂടുതൽ ഭാഷകളിൽ റീമേക് ചെയ്ത മലയാള ചിത്രമാണ്. തമിഴ്, തെലുങ്ക്, കന്നഡ, ഹിന്ദി, ചൈനീസ്, സിംഹളീസ് ഭാഷകളിലേക്ക് റീമേക് ചെയ്ത ദൃശ്യം, ഇംഗ്ലീഷ്, കൊറിയൻ ഭാഷകളിലും ഇനി എത്തും. ഈ ചിത്രത്തിന്റെ മൂന്നാം ഭാഗവും ആലോചനയിൽ ഉണ്ടെന്നു മോഹൻലാൽ , ജീത്തു ജോസഫ്, ആന്റണി പെരുമ്പാവൂർ എന്നിവർ പറഞ്ഞിരുന്നു. 8 കോടി രൂപയ്ക്കു നിർമ്മിച്ച ദൃശ്യം 2 വിവിധ ബിസിനസ്സുകളിലൂടെ അമ്പതു കോടി രൂപയ്ക്കു മുകളിൽ ആണ് നേടിയത്.