തകർപ്പൻ മാസ്സ് ലുക്കിൽ ബിജു മേനോൻ; പടയോട്ടത്തിന്റെ പുതിയ പോസ്റ്റർ പുറത്തിറങ്ങി….

മലയാളികളുടെ പ്രിയ താരം ബിജുമേനോൻ നായക വേഷത്തിൽ എത്തുന്ന ഏറ്റവും പുതിയ ചിത്രം പടയോട്ടത്തിന്റെ പോസ്റ്റർ പുറത്തിറങ്ങി. ആദ്യ പോസ്റ്റർ പോലെ തന്നെ തകർപ്പൻ മാസ്സ് ലുക്കിലാണ് ബിജു മേനോൻ ഇത്തവണയും എത്തിയിരിക്കുന്നത്. ചിത്രത്തിൽ മാസ്സ് രംഗങ്ങൾക്ക് ഏറെ പ്രാധാന്യം നൽകി ഒരുക്കിയ ഒരു കഥാപാത്രത്തെയാണ് അദ്ദേഹം അവതരിപ്പിക്കുന്നത്. കോളനിയിലെ പ്രധാന ഗുണ്ടയായ ചെങ്കൽ രഘുവിന്റെ വേഷത്തിലാണ് അദ്ദേഹം എത്തുന്നത്. ബിജു മേനോൻ ഇന്നേവരെ കാണാത്ത മാസ്സ് പരിവേഷത്തിൽ എത്തുമ്പോൾ അദ്ദേഹം വ്യത്യസ്തമായ ഒരു ഗെറ്റപ്പാണ് അതിനായി സ്വീകരിച്ചിരിക്കുന്നതും. നരച്ച താടിയും മുടിയും ഉള്ള കിടിലൻ ലുക്കിലാണ് പോസ്റ്ററുകളിൽ എല്ലാം ബിജു മേനോൻ എത്തിയത്.

റഫീഖ് ഇബ്രാഹിം സംവിധാനം ചെയ്യുന്ന ചിത്രത്തിൽ ഹരീഷ് കണാരൻ, ദിലീഷ് പോത്തൻ, അനു സിത്താര, ഗണപതി, സൈജു കുറുപ്പ് തുടങ്ങി ഒരു നീണ്ട താരനിര തന്നെയുണ്ട്. ടിയാൻ എന്ന ചിത്രത്തിലൂടെ മലയാള സിനിമയിലേക്ക് എത്തിയ ബോളീവുഡ് താരം രവി സിംഗ് ചിത്രത്തിൽ വില്ലൻ കഥാപാത്രത്തെ അവതരിപ്പിക്കുന്നുണ്ട്. അരുൺ, അജയ് രാഹുൽ എന്നിവർ ചേർന്നാണ് ചിത്രത്തിന്റെ രചന നിർവ്വഹിച്ചിരിക്കുന്നത്. അൻവർ, ടിയാൻ, ആദി തുടങ്ങിയ സൂപ്പര്ഹിറ്റുകൾക്ക് ഛായാഗ്രാഹണം ഒരുക്കിയ സതീഷ് കുറുപ്പാണ് ചിത്രത്തിനായി ഛായാഗ്രാഹണം നിർവ്വഹിച്ചിരിക്കുന്നത്. ബാംഗ്ലൂർ ഡെയ്‌സ്, മുന്തിരി വള്ളികൾ തളിർക്കുമ്പോൾ തുടങ്ങിയ ചിത്രങ്ങളിലൂടെ വമ്പൻ വിജയം കൊയ്ത സോഫിയ പോൾ മൂന്നാമതായി നിർമ്മിക്കുന്ന ചിത്രമെന്ന പ്രത്യേകതയോട് കൂടിയാണ് ചിത്രം വരുന്നത്. ചിത്രം ഓണത്തിന് തീയേറ്ററുകളിൽ എത്തും.