ആക്ഷൻ സൂപ്പർസ്റ്റാറിന്റെ മാസ്സ് ത്രില്ലർ ഇന്ന് മുതൽ; ജോഷി- സുരേഷ് ഗോപി ചിത്രം പാപ്പന്റെ തീയേറ്റർ ലിസ്റ്റ് ഇതാ

ഒരുപിടി വമ്പൻ ഹിറ്റുകൾ നമ്മുക്ക് സമ്മാനിച്ച ഒരു ടീമാണ് ജോഷി- സുരേഷ് ഗോപി ടീം. വർഷങ്ങളുടെ ഇടവേളക്കു ശേഷം ഇവർ വീണ്ടും ഒന്നിക്കുന്ന ചിത്രമാണ് പാപ്പൻ. ഇന്ന് കേരളത്തിലെ സ്‌ക്രീനുകളിൽ പ്രദർശനമാരംഭിക്കുന്ന ഈ ചിത്രം ഇവിടുത്തെ 250 ലധികം സ്‌ക്രീനുകളിലാണ് എത്തുന്നത്. ഒരു മാസ്സ് ക്രൈം ത്രില്ലറായാണ് പാപ്പൻ ഒരുക്കിയിരിക്കുന്നത്. കെയർ ഓഫ് സൈറാബാനു എന്ന പ്രേക്ഷക- നിരൂപക പ്രശംസ നേടിയ ചിത്രത്തിന് ശേഷം ആർ ജെ ഷാൻ രചിച്ച ഈ ചിത്രത്തിൽ എബ്രഹാം മാത്യു മാത്തൻ എന്ന പോലീസ് ഓഫീസർ ആയാണ് സുരേഷ് ഗോപി അഭിനയിച്ചിരിക്കുന്നത്. ഒരു വലിയ ഇടവേളയ്ക്കു ശേഷമാണ് പോലീസ് യൂണിഫോമിൽ അദ്ദേഹമഭിനയിച്ചതെന്നതും പ്രേക്ഷകരെ ആകർഷിച്ച ഘടകമാണ്. ഡേവിഡ് കാച്ചപ്പിള്ളി പ്രൊഡക്ഷൻസിന്റെയും ഇഫാർ മീഡിയയുടെയും, ശ്രീ ഗോകുലം മൂവീസിന്റെയും ബാനറിൽ യഥാക്രമം ഡേവിഡ് കാച്ചപ്പിള്ളിയും റാഫി മതിരയും ഗോകുലം ഗോപാലനും ചേർന്നാണ് പാപ്പൻ നിർമ്മിച്ചിരിക്കുന്നത്.

നൈല ഉഷ, നീത പിള്ളൈ, ഗോകുൽ സുരേഷ് ഗോപി, ആശ ശരത്, കനിഹ, മാളവിക മേനോൻ, വിജയ രാഘവൻ, ടിനി ടോം, ഷമ്മി തിലകൻ, ശ്രീജിത്ത് രവി, മാല പാർവതി, സാധിക വേണുഗോപാൽ, അഭിഷേക് രവീന്ദ്രൻ, ചന്ദുനാഥ്, ഡയാന ഹമീദ്, ജുവൽ മേരി തുടങ്ങി ഒരു വമ്പൻ താരനിര സുരേഷ് ഗോപിയോടൊപ്പം പ്രത്യക്ഷപ്പെടുന്ന ഈ ചിത്രത്തിന്റെ ട്രൈലെർ, ഇതിലെ ഗാനങ്ങൾ എന്നിവ സൂപ്പർ ഹിറ്റായിരുന്നു. അതുപോലെ ഇതിന്റെ കിടിലൻ പോസ്റ്ററുകളും പ്രേക്ഷക പ്രതീക്ഷ വർധിപ്പിച്ചിട്ടുണ്ട്. അജയ് ഡേവിഡ് കാച്ചപ്പിള്ളി ദൃശ്യങ്ങൾ ഒരുക്കിയ ഈ ചിത്രത്തിന് സംഗീതമൊരുക്കിയത് ജേക്സ് ബിജോയിയും, ഡിറ്റ് ചെയ്തത് ശ്യാം ശശിധരനുമാണ്.