കുടുംബ പ്രേക്ഷകർ ഏറ്റെടുത്തു മെഗാസ്റ്റാറിന്റെ ഒരു കുട്ടനാടൻ ബ്ലോഗ്; ചിത്രം നിറഞ്ഞ സദസ്സിൽ പ്രദർശനം തുടരുന്നു..!

ഈ കഴിഞ്ഞ വെള്ളിയാഴ്ച റിലീസ് ചെയ്ത മലയാള ചിത്രമാണ് മെഗാസ്റ്റാർ മമ്മൂട്ടി നായകനായി എത്തിയ ഒരു കുട്ടനാടൻ ബ്ലോഗ്. മികച്ച പ്രേക്ഷക പ്രതികരണം നേടിയെടുത്ത ഈ ചിത്രം ഇപ്പോൾ കേരളത്തിലെ പ്രദർശന ശാലകളിൽ നിറഞ്ഞ സദസ്സിൽ പ്രദർശിപ്പിച്ചു കൊണ്ടിരിക്കുകയാണ്. കുടുംബ പ്രേക്ഷകരാണ് കൂടുതലും ഈ ചിത്രം കാണാൻ എത്തുന്നത് എന്നത് തന്നെയാണ് ഇതിന്റെ വിജയ കാരണം. സ്ത്രീകളും കുട്ടികളും ഏറെയിഷ്ടപെടുന്ന ഈ ചിത്രം മമ്മൂട്ടി ആരാധകർക്കും യുവ പ്രേക്ഷകർക്കും ആവേശമാകുന്നുണ്ട് എന്നതും വലിയ വിജയത്തിലേക്ക് തന്നെ ഈ ചിത്രം ചെന്നെത്തും എന്ന വ്യക്തമായ സൂചനയാണ് നമ്മുക്ക് നൽകുന്നത്. പ്രശസ്ത തിരക്കഥാകൃത്തായ സേതു ആദ്യമായി സംവിധാനം ചെയ്ത ചിത്രമാണ് ഇത്. അദ്ദേഹം തന്നെ രചനയും നിർവഹിച്ച ഈ ചിത്രം തികച്ചും ഗ്രാമീണ പശ്ചാത്തലത്തിൽ ഒരുക്കിയിരിക്കുന്ന ഒരു ഫീൽ ഗുഡ് ഫാമിലി എന്റെർറ്റൈനെർ ആണ്.

ചിരിക്കാനുള്ള ഏറെ മുഹൂർത്തങ്ങളാൽ സമ്പന്നമായ ഈ ചിത്രം, വൈകാരിക മുഹൂർത്തങ്ങൾ കൊണ്ടും മികച്ച ഗാനങ്ങൾ കൊണ്ടും ആവേശം നൽകുന്ന രംഗങ്ങൾ കൊണ്ടും പ്രേക്ഷകരെ കയ്യിലെടുക്കുന്നുണ്ട്. ശ്രീനാഥ് ശിവശങ്കരൻ ഈണം നൽകിയ ഗാനങ്ങളും അതുപോലെ പ്രദീപ് നായർ ഒരുക്കിയ ദൃശ്യങ്ങളും ഈ ചിത്രത്തിന് മുതൽക്കൂട്ടായി വന്നിട്ടുണ്ട് എന്ന കാര്യവും എടുത്തു പറഞ്ഞേ പറ്റു. അനന്താ വിഷന്റെ ബാനറിൽ മുരളീധരൻ , ശാന്ത മുരളി എന്നിവർ നിർമ്മിച്ച ഈ ചിത്രത്തിൽ ലക്ഷ്മി റായ്, ഷംന കാസിം, അനു സിതാര എന്നീ മൂന്നു നായികമാർ ആണുള്ളത്. അത് കൂടാതെ നെടുമുടി വേണു, ലാലു അലക്സ്, ജേക്കബ് ഗ്രിഗറി, ആദിൽ ഇബ്രാഹിം, സഞ്ജു ശിവറാം, സണ്ണി വെയ്ൻ, അനന്യ , ഷഹീൻ സിദ്ദിഖ്, സോഹൻ സീനുലാൽ തുടങ്ങി ഒരു വലിയ താര നിര തന്നെയുണ്ട് ഈ ചിത്രത്തിന്റെ ഭാഗമായിട്ട്.