കുടുംബ പ്രേക്ഷകരെ ലക്‌ഷ്യം വെച്ച് ഒരു കുട്ടനാടൻ ബ്ലോഗ് എത്തുന്നു; ചിരിയും സംഗീതവും നാട്ടിൻപുറത്തെ നന്മകളുമായി ഒരു ചിത്രം..!

ഈ വർഷത്തെ ഓണ ചിത്രങ്ങൾക്കിടയിൽ പ്രേക്ഷകർ ഏറെ കാത്തിരിക്കുന്ന ചിത്രമാണ് മെഗാസ്റ്റാർ മമ്മൂട്ടി നായകനായി എത്തുന്ന ഒരു കുട്ടനാടൻ ബ്ലോഗ്. പ്രശസ്ത തിരക്കഥാ രചയിതാവായ സേതുവിൻറെ ആദ്യ സംവിധാന സംരംഭമാണ് ഈ ചിത്രം. ഒരു പക്കാ ഫാമിലി എന്റെർറ്റൈനെർ ആയി ഒരുക്കിയിരിക്കുന്ന ഈ ചിത്രത്തിന്റെ രചന നിർവഹിച്ചിരിക്കുന്നതും സേതു തന്നെയാണ്. അനന്താ വിഷന്റെ ബാനറിൽ മുരളീധരൻ, ശാന്താ മുരളി എന്നിവർ ചേർന്ന് നിർമ്മിച്ചിരിക്കുന്ന ഈ ചിത്രം കുടുംബ ബന്ധങ്ങളും ചിരിയും സംഗീതവും വൈകാരിക മുഹൂർത്തങ്ങളും കോർത്തിണക്കിയ ഒരു പക്കാ ഫീൽ ഗുഡ് എന്റെർറ്റൈനെർ ആണെന്നാണ് സൂചന ലഭിക്കുന്നത്. കുട്ടനാടിന്റെ പശ്‌ചാത്തലത്തിൽ ഒരുക്കിയ ഈ ചിത്രത്തിൽ നാട്ടിൻപുറത്തെ നന്മകളും കാഴ്ചകളും കോർത്തിണക്കിയാണ് സംവിധായകൻ കഥ പറഞ്ഞിരിക്കുന്നതെന്നു റിപ്പോർട്ടുകൾ പറയുന്നു.

ഇതിലെ ഒരു ഗാനം കഴിഞ്ഞ ദിവസം റിലീസ് ചെയ്യുകയും വമ്പൻ പ്രേക്ഷക ശ്രദ്ധ നേടിയെടുക്കുകയും ചെയ്തിരുന്നു. ശ്രീനാഥ് ശിവ ശങ്കരൻ ഈണം നൽകിയ ആ ഗാനം വളരെ രസകരമായി ആണ് ചിത്രീകരിച്ചിരിക്കുന്നത്. മമ്മൂട്ടിയുടെ മിന്നുന്ന പ്രകടനമാണ് ആ ഗാനത്തിന്റെ പ്രത്യേകത. മനോഹരമായ ദൃശ്യങ്ങളും എല്ലാത്തരം പ്രേക്ഷകരേയും ആകർഷിക്കുന്ന സംഗീതവും ഈ ചിത്രത്തിന്റെ ഹൈലൈറ്റ് ആണെന്ന് സോങ് വീഡിയോ സൂചിപ്പിക്കുന്നു. ലക്ഷ്മി റായ്, അനു സിതാര, ഷംന കാസിം എന്നിവരാണ് ഈ ചിത്രത്തിലെ നായികാ വേഷങ്ങൾ അവതരിപ്പിക്കുന്നത്. ഹരി എന്ന കഥാപാത്രത്തെയാണ് മമ്മൂട്ടി ഈ ചിത്രത്തിൽ അവതരിപ്പിക്കുന്നത്. ഇവരെ കൂടാതെ സണ്ണി വെയ്ൻ , ആദിൽ ഇബ്രാഹിം, സഞ്ജു ശിവറാം , ജേക്കബ് ഗ്രിഗറി, ഷഹീൻ സിദ്ദിഖ്, നെടുമുടി വേണു, സോഹൻ സീനുലാല് തുടങ്ങി ഒട്ടേറെ പ്രശസ്ത താരങ്ങൾ ഈ ചിത്രത്തിൽ അഭിനയിച്ചിട്ടുണ്ട്.