തരംഗമായ ഹൃസ്വ ചിത്രത്തിലെ നായകൻ ഇനി ബിഗ് സ്ക്രീനിലും; ത്രില്ലടിപ്പിക്കാൻ ഓറഞ്ച് വാലി എത്തുന്നു..!

ഡ്രീംവെസ്റ്റ് ഗ്ലോബലിന്റെ ബാനറിൽ പുതുമുഖതാരങ്ങളായ ബിബിൻ മത്തായി, ദിപുൽ എന്നിവർ പ്രധാന വേഷങ്ങൾ അവതരിപ്പിക്കുന്ന ഓറഞ്ച് വാലി എന്ന റൊമാന്റിക് ത്രില്ലർ മെയ് പതിനെട്ടിന് കേരളത്തിലെ തീയേറ്ററുകളിൽ എത്തുന്നു. ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ പ്രേക്ഷകരുടെ ശ്രദ്ധ നേടിയെടുത്തു കഴിഞ്ഞു. എന്റെ ഹൃദയത്തിൻറെ വടക്ക് കിഴക്കേ അറ്റത്ത് എന്ന തരംഗമായി മാറിയ ഹൃസ്വ ചിത്രത്തിലൂടെ ഏറെ പ്രശസ്തി നേടിയ ബിബിൻ മത്തായി ആണ് ഈ ചിത്രത്തിലെ പ്രധാന വേഷം ചെയ്യുന്നത്. ഒരു ഐ പി എസ് ഓഫീസർ ആയാണ് ബിബിൻ ഓറഞ്ച് വാലിയിൽ പ്രത്യക്ഷപ്പെടുന്നത്. ആർ കെ ഡ്രീം വെസ്റ്റ് സംവിധാനം ചെയ്തിരിക്കുന്ന ഈ ചിത്രത്തിൽ മുകളിൽ പറഞ്ഞവർ കൂടാതെ വന്ദിത മനോഹരൻ, ബൈജു ബാല, പി എൻ അല ലക്ഷ്മൺ , മോഹൻ ഒല്ലൂർ എന്നിവരും വേഷമിട്ടിരിക്കുന്നു.

റിത്വിക് എസ് ചന്ദ് സംഗീതം പകർന്നിരിക്കുന്ന ഈ ചിത്രത്തിന് വേണ്ടി തിരക്കഥയും സംഭാഷണവും ഒരുക്കിയതും ഈ ചിത്രം എഡിറ്റ് ചെയ്തിരിക്കുന്നതും ആർ കെ ഡ്രീം വെസ്റ്റ് ആണ്. നിതിൻ രാജ് ആണ് ഓറഞ്ച് വാലിക്ക് വേണ്ടി ദൃശ്യങ്ങൾ ഒരുക്കിയിരിക്കുന്നത്. ജോൺസൻ തങ്കച്ചൻ, ജോർജ് വർക്കി, ആർ കെ ഡ്രീം വെസ്റ്റ് എന്നിവർ ചേർന്നാണ് ഈ ചിത്രത്തിന്റെ നിർമ്മാണം നിർവഹിച്ചിരിക്കുന്നത്. ബിഹൈൻഡ് എവെരി ഗ്രേറ്റ് മൂവി ഈസ് എ ഗ്രേറ്റ് സ്റ്റോറി എന്നാണ് ചിത്രത്തിന്റെ ടാഗ് ലൈൻ. ഏതായാലും പ്രേക്ഷകർക്ക് പുതുമ സമ്മാനിക്കുന്ന ഒരു റൊമാന്റിക് ത്രില്ലർ ആയിരിക്കും ഓറഞ്ച് വാലി എന്നാണ് അണിയറ പ്രവർത്തകരുടെ വിശ്വാസവും പ്രതീക്ഷയും.