ഒരു മില്യൺ കാഴ്ചക്കാരുമായി സൂപ്പർഹിറ്റായി വൺ സൈഡ് ലവേഴ്സ് ആന്തം; അനുരാഗത്തിലെ ചില്ല് ആണേ ഗാനം ട്രെൻഡാവുന്നു

ധ്യാൻ ശ്രീനിവാസൻ രചിച്ച് മാത്യു തോമസ് നായകനായ പ്രകാശൻ പറക്കട്ടെ എന്ന സിനിമയുടെ വിജയത്തിന് ശേഷം ഷഹദ് നിലമ്പൂർ സംവിധാനം ചെയ്ത പുതിയ ചിത്രം പ്രേക്ഷകരുടെ മുന്നിൽ എത്തുകയാണ്. അനുരാഗം എന്ന് പേരിട്ടിരിക്കുന്ന ഈ ചിത്രത്തിലെ ആദ്യ ഗാനം ഇപ്പോൾ സോഷ്യൽ മീഡിയയിൽ ട്രെൻഡായി മാറുകയാണ്. വൺവേ പ്രണയിതാക്കളുടെ രസകരമായ ലൈഫിനെക്കുറിച്ച് കഥ പറയുന്ന ഈ ചിത്രത്തിലെ ചില്ല് ആണേ എന്ന വരികളോടെ തുടങ്ങുന്ന ഈ ഗാനം വൺ സൈഡ്‌ ലൗവേഴ്സിന് വേണ്ടിയാണ് ഒരുക്കിയിരിക്കുന്നത്. വൺ സൈഡ്‌ ലൗവേഴ്സ് ആന്തം എന്ന ടാഗ് ലൈനോട് കൂടിയാണ് ഈ ഗാനം റിലീസ് ചെയ്തത്. ഇപ്പോഴിതാ യൂട്യൂബിൽ ഒരു മില്യൺ കാഴ്ചക്കാരെ നേടിയ ഈ ഗാനം പ്രേക്ഷകർ ഇരുകയ്യും നീട്ടി സ്വീകരിച്ചു കഴിഞ്ഞു. ക്വീൻ എന്ന സിനിമയിലൂടെ മലയാളികളുടെ ഇഷ്ട്ടതാരമായി മാറിയ അശ്വിൻ ജോസ് ഒരു പ്രധാന വേഷം ചെയ്യുന്ന ഈ ചിത്രത്തിന്റെ ആദ്യ ടീസറും ഏറെ ശ്രദ്ധ നേടിയിരുന്നു.

ഗൗതം വാസുദേവ് മേനോൻ, ജോണിആന്റണി, ദേവയാനി, ഷീല, 96 എന്ന ചിത്രത്തിലൂടെ പ്രശസ്തയായ ഗൗരി ജി കിഷൻ, മൂസ, ലെനാ, ദുർഗ കൃഷ്ണ, സുധീഷ്, മണികണ്ഠൻ പട്ടാമ്പി എന്നിവരും നിർണ്ണായക വേഷം ചെയ്യുന്ന ഈ ചിത്രം രചിച്ചതും അശ്വിൻ ജോസ് തന്നെയാണ്. ലക്ഷ്മി നാഥ് ക്രിയേഷൻസ് സത്യം സിനിമാസ് എന്നി ബാനറുകളിൽ സുധീഷ് എൻ, പ്രേമചന്ദ്രൻ എ.ജി എന്നിവർ നിർമ്മിക്കുന്ന ഈ ചിത്രത്തിന് ജോയൽ ജോൺസ് സംഗീതമൊരുക്കിയപ്പോൾ ഇതിലെ ഗാനങ്ങൾ രചിച്ചത് മനു മഞ്ജിത്ത്,മോഹൻ കുമാർ,ടിറ്റോ പി.തങ്കച്ചൻ എന്നിവരാണ്. ഈ ചിത്രം എഡിറ്റ് ചെയ്തിരിക്കുന്നത് നിരവധി ഹിറ്റ് സിനിമകളുടെ എഡിറ്ററായ ലിജോ പോലും ഇതിനു ദൃശ്യങ്ങൾ ഒരുക്കിയത് സുരേഷ് ഗോപിയുമാണ്.