16 മിനിറ്റ് ക്ലൈമാക്സ് ഫൈറ്റുമായി ഒടിയൻ; ചിത്രത്തിന് യു സർട്ടിഫിക്കറ്റ്..!

പ്രേക്ഷകർ ഏറെ ആകാംഷയോടെ കാത്തിരിക്കുന്ന മോഹൻലാൽ ചിത്രമായ ഒടിയൻ വരുന്ന ഡിസംബർ പതിനാലിന് ലോകമെമ്പാടും റിലീസ് ചെയ്യാൻ പോവുകയാണ്. കഴിഞ്ഞ ദിവസമാണ് ഈ ചിത്രത്തിന്റെ സെൻസറിങ് നടന്നത്. ക്ലീൻ യു സർട്ടിഫിക്കറ്റ് ലഭിച്ച ഈ ചിത്രം മലയാളത്തിലെ ഏറ്റവും വലിയ റിലീസ് ആയാണ് എത്തുക. പതിനാറു മിനിട്ടു നീണ്ടു നിൽക്കുന്ന ക്ലൈമാക്സ് ഫൈറ്റ് ആണ് ഈ ചിത്രത്തിന്റെ ഹൈലൈറ്റ് എന്നാണ് സൂചന. പീറ്റർ ഹെയ്‌ൻ ഒരുക്കിയ ഈ സംഘട്ടനം അദ്ദേഹത്തിന്റെ കരിയർ ബെസ്റ്റ് ആണെന്നും അദ്ദേഹം പറഞ്ഞിരുന്നു. ഷോലേക്കു ശേഷം ഇന്ത്യൻ സിനിമയിലെ ഏറ്റവും നീളമേറിയ ക്ലൈമാക്സ് സീക്വൻസ് ആണ് ഒടിയൻ എന്ന ചിത്രത്തിൽ ഉള്ളത് എന്നാണ് റിപ്പോർട്ടുകൾ പറയുന്നത്. വി എ ശ്രീകുമാർ മേനോൻ ആദ്യമായി സംവിധാനം ചെയ്ത ഈ ചിത്രം രചിച്ചത് ഹരികൃഷ്ണൻ ആണ്.

ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ചിരിക്കുന്ന ഈ ചിത്രം മൂന്നു ഭാഷകളിൽ ആയാണ് റിലീസ് ചെയ്യുന്നത്. മോഹൻലാലിന്റെ കരിയറിലെ ഇതുവരെയുള്ള ഏറ്റവും വലിയ ചിത്രമായ ഒടിയൻ ലോകം മുഴുവൻ ഒരേ ദിവസം തന്നെ റിലീസ് ചെയ്യുന്ന ആദ്യ മലയാള സിനിമയാണ്. എം ജയചന്ദ്രൻ ഗാനങ്ങൾ ഒരുക്കിയ ഈ ചിത്രത്തിന് പശ്ചാത്തല സംഗീതം ഒരുക്കിയത് സാം സി എസ് ആണ്. ജോൺകുട്ടി എഡിറ്റ് ചെയ്ത ഈ ചിത്രത്തിന് ദൃശ്യങ്ങൾ ഒരുക്കിയത് ഷാജി കുമാർ ആണ്. മഞ്ജു വാര്യർ, പ്രകാശ് രാജ് എന്നിവരും ഈ ചിത്രത്തിന്റെ താര നിരയിൽ ഉണ്ട്. ഇതിലെ രണ്ടു ഗാനങ്ങൾ ഇതിനോടകം റിലീസ് ചെയ്യുകയും അത് രണ്ടും സൂപ്പർ ഹിറ്റായി മാറുകയും ചെയ്തു.