കൂറ്റൻ ഫ്ലെക്സുകളുമായി ഒടിയൻ വരവറിയിക്കുന്നു;ബ്രഹ്മാണ്ഡ റീലീസ് ഒക്ടോബറിൽ..!

മലയാള സിനിമാ പ്രേമികൾ ഇന്ന് ഏറ്റവുമധികം കാത്തിരിക്കുന്ന ചിത്രമാണ് മോഹൻലാൽ നായകനായ ഒടിയൻ. വമ്പൻ ബഡ്ജറ്റിൽ നിർമ്മിക്കുന്ന ഈ ചിത്രം ഇപ്പോൾ അതിന്റെ പോസ്റ്റ് പ്രൊഡക്ഷൻ സ്റ്റേജിൽ ആണ്. ദേശീയ പുരസ്‌കാര ജേതാവ് വി ഹരികൃഷ്ണൻ രചന നിർവഹിച്ച ഈ ചിത്രം സംവിധാനം ചെയ്തിരിക്കുന്നത് വി എ ശ്രീകുമാർ മേനോനും ഈ ചിത്രം നിർമ്മിച്ചിരിക്കുന്നത് ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരും ആണ്. ഇപ്പോഴിതാ ഈ ചിത്രത്തിന്റെ വമ്പൻ ഫ്ലെക്സുകൾ കേരളത്തിൽ ഉയർന്നു തുടങ്ങി കഴിഞ്ഞു. വരുന്ന ഒക്ടോബർ മാസത്തിൽ പൂജ റീലീസ് ആയാണ് ഒടിയൻ എത്തുക എങ്കിലും ഇപ്പോഴേ മലയാളികളുടെ ഇടയിൽ ഈ ചിത്രം സംസാര വിഷയമായി കഴിഞ്ഞു.

മഞ്ജു വാര്യർ നായികാ വേഷത്തിൽ എത്തുന്ന ഈ ചിത്രത്തിലെ വില്ലൻ പ്രകാശ് രാജ് ആണ്. ബോളിവുഡ് നടൻ മനോജ് ജോഷി, സിദ്ദിഖ്, ഇന്നസെന്റ്, നരേൻ, കൈലാസ്, നന്ദു, സന അൽത്താഫ് എന്നിവരും ഈ ചിത്രത്തിന്റെ താര നിരയുടെ ഭാഗമാണ്.

ഈ ചിത്രത്തിനു വേണ്ടി മോഹൻലാൽ നടത്തിയ മേക് ഓവർ ഓൾ ഇന്ത്യാ തലത്തിൽ തന്നെ ശ്രദ്ധ നേടിയിരുന്നു. പീറ്റർ ഹെയ്ൻ ഒരുക്കുന്ന വമ്പൻ സംഘട്ടന രംഗങ്ങൾ ഉള്ള ഒടിയനിൽ പശ്ചാത്തല സംഗീതം നൽകുന്നത് വിക്രം വേദയിലൂടെ പ്രശസ്തനായ സാം സി എസ് ആണ്. എം ജയചന്ദ്രൻ ഗാനങ്ങൾ ഒരുക്കിയ ഈ ചിത്രത്തിന് ദൃശ്യങ്ങൾ ഒരുക്കിയത് ഷാജി കുമാർ ആണ്. മലയാള സിനിമ കണ്ട എക്കാലത്തെയും വലിയ റീലീസ് ആയാണ് ഒടിയൻ എത്താൻ പോകുന്നത്. ചിത്രത്തിന്റെ, ട്രയ്ലർ, പാട്ടുകൾ എന്നിവയൊന്നും വരാതെ തന്നെ മലയാള സിനിമ കണ്ട എക്കാലത്തെയും വലിയ ഹൈപ്പ് ആണ് ഈ ചിത്രം നേടിയിരിക്കുന്നത് എന്നു പറയാതെ വയ്യ.