ഒടിയന്റെ ക്ലൈമാക്സ് മരണ മാസ്സ് എന്ന് സാം സി എസ്; ആരാധകരെ ത്രസിപ്പിക്കും എന്ന് സാം..!

താര ചക്രവർത്തി മോഹൻലാലിന്റെ ഒടിയൻ എന്ന ബ്രഹ്മാണ്ഡ ചിത്രത്തിന്റെ റിലീസ് അടുത്ത് വരികയാണ്. വരുന്ന ഡിസംബർ പതിനാലിന് ആണ് ഈ ചിത്രം ലോകമെമ്പാടും റിലീസ് ചെയ്യുന്നത്. ഇപ്പോൾ ഈ ചിത്രത്തിന്റെ പശ്ചാത്തല സംഗീതമൊരുക്കുന്നതിന്റെ അവസാന ഘട്ടത്തിൽ ആണ് പ്രശസ്ത സംഗീത സംവിധായകനായ സാം സി എസ്. വിക്രം വേദ എന്ന തമിഴ് ചിത്രത്തിലൂടെ പ്രശസ്തനായ സാം സി എസ് ഒരുക്കിയ ഒടിയൻ തീം മ്യൂസിക് ഇപ്പോൾ തന്നെ ടീസർ , ട്രൈലെർ എന്നിവയിലൂടെ ഹിറ്റായി കഴിഞ്ഞു. അദ്ദേഹം ഇപ്പോൾ സോഷ്യൽ മീഡിയ വഴി ഷെയർ ചെയ്ത ഒരു പോസ്റ്റ് വൈറൽ ആയിരിക്കുകയാണ്.

ഒടിയന്റെ ക്ലൈമാക്സ് ബിജിഎം ആണ് താൻ ഇനി ചെയ്യാൻ പോകുന്നത് എന്നും മരണ മാസ്സ് ക്ലൈമാക്സ് ആണ് ഒടിയൻ ടീം ഒരുക്കിയിരിക്കുന്നതെന്നും സാം സി എസ് പറയുന്നു. ആ ക്ലൈമാക്സിനു സംഗീതം ഒരുക്കാൻ താൻ ഏറെ ആവേശഭരിതൻ ആണെന്നും സാം പറയുന്നു. മോഹൻലാൽ ആരാധകരെ ത്രസിപ്പിക്കുന്ന ക്ലൈമാക്സ് ആയിരിക്കും ഒടിയൻ ഒരുക്കുന്നത് എന്നാണ് സാം പറയുന്നത്. എം ജയചന്ദ്രൻ ആണ് ഈ ചിത്രത്തിലെ ഗാനങ്ങൾ ഒരുക്കിയിരിക്കുന്നത്. വി എ ശ്രീകുമാർ മേനോൻ സംവിധാനം ചെയ്ത ഈ ചിത്രം രചിച്ചത് ദേശീയ അവാർഡ് ജേതാവായ ഹരികൃഷ്ണനും നിർമ്മിച്ചിരിക്കുന്നത് ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരും ആണ്. മോഹൻലാലിനൊപ്പം പ്രകാശ് രാജ്, മഞ്ജു വാര്യർ എന്നിവരും അഭിനയിക്കുന്ന ഈ ഫാന്റസി ത്രില്ലറിന് സംഘട്ടന സംവിധാനം നിർവഹിച്ചിരിക്കുന്നത് പീറ്റർ ഹെയ്‌ൻ ആണ്. ഒടിയന്റെ തെലുഗ് വേർഷനും മലയാള വേർഷനൊപ്പം തന്നെ റിലീസ് ചെയ്യും.