വീണ്ടും ശക്‌തമായ സ്ത്രീ കഥാപാത്രവുമായി നൈല ഉഷ കയ്യടി നേടുന്നു; ദിവാൻജിമൂല ഗ്രാൻഡ് പ്രിക്‌സ് മുന്നോട്ടു..!

പ്രേക്ഷകരുടെ മികച്ച പിന്തുണയുമായി അനിൽ രാധാകൃഷ്ണൻ മേനോന്റെ കുഞ്ചാക്കോ ബോബൻ ചിത്രം ദിവാൻജിമൂല ഗ്രാൻഡ് പ്രിക്‌സ് മുന്നേറുകയാണ്. റിലീസ് ദിനം മുതൽ മികച്ച അഭിപ്രായം നേടിയെടുത്ത ഈ ചിത്രം അഭിനേതാക്കളുടെ മിന്നുന്ന പ്രകടനം കൊണ്ടും ശ്രദ്ധ നേടുകയാണ്. നൈല ഉഷയാണ് അങ്ങനെ കയ്യടി നേടുന്ന ഒരു താരം. വളരെ ശ്കതമായ ഒരു സ്ത്രീ കഥാപാത്രത്തെയാണ് നൈല ഈ ചിത്രത്തിൽ അവതരിപ്പിച്ചിരിക്കുന്നത്. എഫിമോൾ എന്ന് പേരുള്ള ഈ കഥാപാത്രം കിടപ്പിലായ അച്ഛനെ നോക്കുന്ന, അനിയത്തിയെ പഠിപ്പിക്കുന്ന, തന്റെ വാർഡിലെ ഏവരുടെയും പ്രശ്നങ്ങൾ പരിഹരിക്കാൻ എന്നും മുന്നിട്ടു നിൽക്കുന്ന വാർഡ് മെമ്പർ ആയ ഒരു കഥാപാത്രം ആണ്. ഈ ചിത്രത്തിന്റെ കഥ മുന്നോട്ടു നീങ്ങുന്നത് തന്നെ ഈ കഥാപാത്രത്തെയും ചുറ്റിപ്പറ്റിയാണ്. ഒരുപക്ഷെ നായകനെക്കാളും പ്രാധാന്യമുള്ള, സ്ക്രീൻ സ്പേസ് ഉള്ള കഥാപാത്രം ആണ് നൈല അവതരിപ്പിച്ച എഫിമോൾ എന്ന കഥാപാത്രം എന്ന് പറയാം.

നൈലയെ കൂടാതെ കുഞ്ചാക്കോ ബോബൻ അവതരിപ്പിച്ച സാജൻ ജോസഫ് ഐ എ എസ്, സിദ്ദിഖ് അവതരിപ്പിച്ച ജിതേന്ദ്രൻ, വിനായകൻ അവതരിപ്പിച്ച ബ്രദർ വറീത്, നെടുമുടി വേണുവിന്റെ ഡേവിസ് എന്നിവരും ഈ ചിത്രത്തിലെ നിർണ്ണായക കഥാപാത്രങ്ങൾ ആണ്.

തൃശൂർ നഗരത്തിന്റെ പശ്ചാത്തലത്തിൽ കഥ പറഞ്ഞിരിക്കുന്ന ഈ ചിത്രത്തെ നമ്മുക്ക് ഒരു സ്പോർട്സ് മൂവി എന്ന് വേണമെങ്കിലും വിളിക്കാം. കാരണം, ഇതിൽ പറഞ്ഞിരിക്കുന്ന കഥ ബൈക് റേസുമായി ബന്ധപ്പെട്ടാണ് എന്നുള്ളത് കൊണ്ട് തന്നെ. അനിൽ രാധാകൃഷ്ണൻ മേനോനും പ്രശാന്ത് നായരും ചേർന്ന് തിരക്കഥ രചിച്ചിരിക്കുന്ന ഈ ചിത്രത്തിന് സംഗീതം നൽകിയത് ഗോപി സുന്ദറും ദൃശ്യങ്ങൾ ഒരുക്കിയത് അലക്സ് ജെ പുളിക്കലും ആണ് .