യൗവനം തിരിച്ചു പിടിച്ചത് ഒടിയൻ മാണിക്യൻ മാത്രമല്ല മോഹൻലാലും; ആവേശം നിറച്ചു പുതിയ ചിത്രങ്ങൾ

ഒടിയൻ മാണിക്യൻ ആയുള്ള പുത്തൻ മേക് ഓവർ അവതരിപ്പിച്ച ടീസറിൽ മോഹൻലാൽ പറഞ്ഞ ഡയലോഗ് യൗവനം തിരിച്ചു പിടിച്ച ഒടിയൻ മാണിക്യനെ കുറിച്ചാണ്. യൗവനം തിരിച്ചു പിടിക്കാൻ സഹായിച്ച കാലത്തിനു നന്ദി പറയുന്ന മാണിക്യനെ ആണ്‌ നമ്മൾ ആ ടീസറിൽ കണ്ടത് എങ്കിൽ ഇന്ന് പുറത്തു വന്ന ചിത്രങ്ങൾ പറയുന്നത് മാണിക്യൻ മാത്രമല്ല മോഹൻലാലും യൗവനം തിരിച്ചു പിടിച്ചു കഴിഞ്ഞു എന്നാണ്. മോഹൻലാൽ കേരളത്തിൽ വന്നിറങുന്ന പുതിയ ചിത്രങ്ങൾ ഇപ്പോൾ ആരാധകരെയും സിനിമ പ്രേമികളെയും ഒരിക്കൽ കൂടി കോരിത്തരിപ്പിച്ചിരിക്കുകയാണ്. മീശ വടിച്ചു കിടിലൻ ലുക്കിൽ ചെറുപ്പക്കാരനെ പോലെ വന്നിറങ്ങിയ മോഹൻലാൽ നാളെ ഇടപ്പള്ളിയിൽ മൈ ജി ഷോറൂം ഉത്ഘാടനം ചെയ്യാനുമെത്തും. നാളെ മോഹൻലാലിനെ കാണാൻ വമ്പൻ ജനാവലി തന്നെ എത്തുമെന്നുറപ്പ്.

മോഹൻലാലിൻറെ ഈ ലുക്ക് കാണുമ്പോൾ മലയാളികൾ സഞ്ചരിക്കുന്നത് മുപ്പതോളം വർഷങ്ങൾ പുറകിലേക്കാണ്. കാരണം സത്യൻ അന്തിക്കാട് 1986 ഇൽ ഒരുക്കിയ പപ്പൻ പ്രീയപ്പെട്ട പപ്പൻ എന്ന ചിത്രത്തിലേതിന് സാമ്യമുള്ള ഒരു ലുക്കിൽ ആണ്‌ മോഹൻലാൽ ഇപ്പോൾ ഉള്ളത്. ആ ചിത്രത്തിൽ അഭിനയിക്കുമ്പോൾ മോഹൻലാലിന് വെറും ഇരുപത്തിയാറു വയസ്സ് മാത്രം ആണുള്ളത്.

അതിനോട് വളരെയേറെ സാമ്യമുള്ള ഒരു ശരീര ഭാഷയിലേക്കാണ് മോഹൻലാൽ ഈ അൻപത്തിയേഴാം വയസ്സിൽ എത്തിയിരിക്കുന്നത് എന്നത് വിസ്മയത്തോടെ മാത്രമേ കാണാൻ കഴിയു. ഈ ലുക്കിൽ ഒടിയൻ എന്ന ചിത്രത്തിൽ അദ്ദേഹം ജനുവരിയിൽ ജോയിൻ ചെയ്യും. വി എ ശ്രീകുമാർ മേനോൻ ആണ് ഒടിയൻ ഒരുക്കുന്നത്.