പത്തൊൻപത് വർഷങ്ങൾക്ക് ശേഷം ശാന്തി കൃഷ്ണ വീണ്ടും..

ഒരുകാലത്ത് മലയാള സിനിമയുടെ പ്രിയ താരമായിരുന്നു ശാന്തി കൃഷ്ണ. നീണ്ട് ചുരുണ്ട മുടിയും ഭംഗിയുള്ള പുരികവും മനോഹരമായ ചിരിയും കൊണ്ട് മലയാളികളുടെ മനസ്സ് കവർന്ന സുന്ദരി. മലയാളത്തിലും തമിഴിലും ഒട്ടേറെ നല്ല സിനിമയുടെ ഭാഗമാകാൻ ശാന്തി കൃഷ്ണയ്ക്ക് ആ കാലത്ത് കഴിഞ്ഞിട്ടുണ്ട്.

1980ൽ പദ്മരാജൻ എഴുതിയ ശാലിനി എന്റെ കൂട്ടുകാരി എന്ന ചിത്രത്തിലൂടെയാണ് ശാന്തി കൃഷ്ണ വെള്ളിത്തിരയിൽ എത്തുന്നത്. തുടർന്ന് 50ൽ അധികം സിനിമകളിൽ അഭിനയിച്ച ശാന്തി കൃഷ്ണ 1998ൽ ഇറങ്ങിയ മഞ്ജീരധ്വനി എന്ന ചിത്രത്തിലാണ് അവസാനമായി അഭിനയിക്കുന്നത്.

ഇതാ ഇപ്പോൾ പത്തൊൻപത് വർഷങ്ങളുടെ ഇടവേളക്ക് ശേഷം ശാന്തി കൃഷ്ണ മലയാളസിനിമയിലേക്ക് തിരിച്ചുവരവ് നടത്തിയിരിക്കുകയാണ്. നിവിൻ പോളി ചിത്രം ഞണ്ടുകളുടെ നാട്ടിൽ ഒരിടവേളയിലൂടെയാണ് ശാന്തി കൃഷ്ണയുടെ തിരിച്ചുവരവ്.

ഷീല ചാക്കോ എന്ന വീട്ടമ്മയുടെ വേഷത്തിലാണ് ശാന്തി കൃഷ്ണ ഈ ചിത്രത്തിൽ എത്തുന്നത്. ശാന്തി കൃഷ്ണയുടെ ചിത്രത്തിലെ ലുക്ക് കഴിഞ്ഞ ദിവസം അണിയറ പ്രവർത്തകർ പുറത്ത് വിട്ടിരുന്നു.

ഓണചിത്രമായി ഒരുങ്ങുന്ന ഞണ്ടുകളുടെ നാട്ടിൽ ഒരിടവേള സംവിധാനം ചെയ്യുന്നത് പുതുമുഖ സംവിധായകൻ അൽത്താഫാണ്.