ദി കുങ്ഫു മാസ്റ്റർ മലയാള സിനിമാ ചരിത്രത്തിലെ ഏറ്റവും മികച്ച ആക്ഷൻ ചിത്രങ്ങളിലൊന്ന്; ശ്രദ്ധ നേടി നിവിൻ പോളിയുടെ വാക്കുകൾ

പ്രശസ്ത സംവിധായൻ എബ്രിഡ് ഷൈൻ ഒരിക്കൽ കൂടി പ്രേക്ഷകരുടെ കയ്യടി നേടിയെടുക്കുന്ന കാഴ്ചയാണ് കാണാൻ സാധിക്കുന്നത്. 1983, ആക്ഷൻ ഹീറോ ബിജു, പൂമരം എന്നീ ചിത്രങ്ങൾക്ക് ശേഷം അദ്ദേഹം സംവിധാനം ചെയ്ത ദി കുങ്ഫു മാസ്റ്റർ എന്ന ചിത്രം ഇപ്പോൾ പ്രേക്ഷകരുടെയും നിരൂപകരുടെയും പ്രശംസ ഒരുപോലെ നേടിയെടുത്തു കൊണ്ട് തീയേറ്ററുകളിൽ മുന്നേറുകയാണ്. കിടിലൻ ആക്ഷനും പ്രതികാരവുമെല്ലാം നിറഞ്ഞ ഒരു മാസ്സ് ചിത്രമായി ഒരുക്കിയിരിക്കുന്ന ഈ ചിത്രം ഇതിന്റെ പേര് സൂചിപ്പിക്കുന്നത് പോലെ കുങ്ഫു എന്ന മാർഷ്യൽ ആർട്സിനു പ്രാധാന്യം നൽകിയാണ് ഒരുക്കിയിരിക്കുന്നത്. പൂമരത്തിലൂടെ മലയാള സിനിമയിലെത്തിയ നീത പിള്ള പ്രധാന വേഷം ചെയ്തിരിക്കുന്ന ഈ ചിത്രത്തിൽ ജിജി സ്കറിയ, സനൂപ് എന്നിവരും ഗംഭീര പ്രകടനം കാഴ്ച വെച്ചിരിക്കുന്നു.

ഇപ്പോൾ ഈ ചിത്രത്തിന് പ്രശംസയുമായി എത്തിയിരിക്കുന്നത് യുവ താരം നിവിൻ പോളി ആണ്. എബ്രിഡ് ഷൈൻ ഒരുക്കിയ ആദ്യ രണ്ടു ചിത്രങ്ങളിലും നായക വേഷം ചെയ്ത നിവിൻ പോളി പറയുന്നത് ദി കുങ്ഫു മാസ്റ്റർ മലയാള സിനിമാ ചരിത്രത്തിലെ തന്നെ ഏറ്റവും മികച്ച ആക്ഷൻ ചിത്രങ്ങളിൽ ഒന്നാണെന്നാണ്. ചിത്രവും അതിൽ അഭിനയിച്ചവരുടെ പ്രകടനവും അവരുടെ ആക്ഷൻ രംഗങ്ങളും ഗംഭീരമായിട്ടുണ്ട് എന്ന് പറഞ്ഞ നിവിൻ, എബ്രിഡ് ഷൈൻ എന്ന സംവിധായകൻ തന്റെ പ്രതിഭ ഒരിക്കൽ കൂടി ലോകത്തിനു കാണിച്ചു തന്നു എന്നും പറയുന്നു. ഏതായാലും ഗംഭീര പ്രതികരണമാണ് ഈ ചിത്രം എല്ലായിടത്തും നിന്നും നേടിയെടുക്കുന്നത്. ഈ ചിത്രം രചിച്ചിരിക്കുന്നതും എബ്രിഡ് ഷൈൻ തന്നെയാണ്.